Dien Saam as Een

Deur Rob Nieminen

“Al is ons baie, vorm ons saam een liggaam omdat ons aan Christus verbind is, en as ledemate van hierdie één liggaam hoort ons saam en het ons mekaar nodig.” — Romeine 12:5b (NLV).

Ons hoofpastoor, Doug Sauder, het al dikwels gesê die kerk is nie 'n passasierskip nie, maar 'n oorlogskip. Die analogie is akkuraat omdat daar nie passasiers aan boord van 'n oorlogskip is nie — slegs bemanningslede in aktiewe diens wat noodsaaklik is vir die vaartuig se suksesvolle oorlogvoering. Net so is die kerk op 'n sending om dissipels van alle nasies te maak (Matteus 28:16–20) en slegs Christene is toevertrou om die sendingopdrag uit te voer.

In vandag se vers sê die apostel Paulus ons is lede van een liggaam, die kerk, wat aan Jesus behoort. Die Griekse woord vir lid wat hier gebruik word is mélos, wat vertaal word as “'n lid (deel) wat tot die geheel behoort.” Interessant genoeg is die woord mélos ook in die ou tyd gebruik om na 'n oorlogstuig en die werkende dele van 'n skip te verwys. Om dit eenvoudig te stel, die geheel is groter as die som van sy individuele dele.

Daar is egter 'n punt wat ek dink Paulus nie wil hê ons moet mis nie. Al speel ons elkeen 'n ander rol in die breër sending van die kerk, is ons diep met mekaar verbind net soos ons fisieke liggaamsdele is. Geen Christen is onbelangrik nie! In 1 Korintiërs 12:2–3 (NLV), skryf Paulus: “Die oog kan nie vir die hand sê: ‘Ek kan sonder jou klaarkom nie.’ En op sy beurt kan die kop nie vir die voete sê: ‘Ek kan sonder julle klaarkom' nie. Om die waarheid te sê, juis daardie liggaamsdele wat vir ons onbelangrik lyk, is des te meer noodsaaklik. En die dele van ons liggaam wat ons as minder eervol beskou, beklee ons met groter sorg ..."

Albert Barnes se Notas oor die Bybel beskryf ons verhoudings as Christene so: “Ons is so verbind aan mekaar dat ons wedersyds afhanklik is; elkeen is in diens van die ander en die bestaan en funksie van die een is nodig vir die bruikbaarheid van die ander. Dus is elke individu in die kerk nie net nodig in sy plek as individu nie, maar is ook nodig vir die behoorlike simmetrie en die werking van die kerk in geheel.”

Hoe speel dit dus af in ons alledaagse lewens as lede van die kerk? Paulus spel dit redelik duidelik uit wanneer hy skryf: “sodat daar nie verdeeldheid in die liggaam sou wees nie, maar dat die lede gelyke sorg vir mekaar dra. As een lid ly, ly al die lede saam; en as een lid geëer word, is al die lede saam bly” (1 Korintiërs 12:25–26).

Om uit die lirieke van die gewilde U2-liedjie, “One”, te leen:

Een liefde, een bloed
Een lewe, jy moet doen wat jy moet
Een lewe met mekaar
Susters, broers
Een lewe, maar ons is nie dieselfde nie
Ons dra mekaar, dra mekaar
Een

Pouse: Watter rol voel jy het God jou geroep om in die liggaam van Christus te speel en op watter maniere kan jy die ander lede om jou dien?

Oefening: As jy nie seker is wat jou gawes is nie, maar graag wil uitvind, begin deur 'n lys te maak van die dinge waarvan jy hou, die dinge waaroor jy passievol is, die dinge wat jou opgewonde maak of vir jou vreugde bring en die dinge waarmee jy goed is. Oorweeg dit om 'n toets vir geestelike gawes af te lê en ondersoek hoe jy hierdie dinge kan ontwikkel en slyp en dit kan gebruik om ander te dien.

Bid: Hemelse Vader, dankie dat U my in u familie ingebring het om deel van u liggaam te wees. Wys my asseblief hoe U my wil gebruik om aan U eer te bring en om diegene om my te dien. Help my om as 'n eenheid met my broers en susters in Christus te leef, om te deel in beide hulle vreugde en hartseer, om die gawes wat U my gegee het in die praktyk toe te pas. In die Naam van Jesus. Amen.