God Het 'n Unieke Doel Vir Elkeen Van Ons

Deur Mirely Maldonado

“want ons is God se handewerk. Hy het ons in ons eenheidsband met Christus Jesus só gemaak dat ons die goeie werke wat Hy vir ons bestem het, kan uitlewe.” — Efesiërs 2:10 (NLV)

“Waarvoor is ek hier?” Ek is baie seker dit is 'n vraag wat die meeste, indien nie almal van ons nie, onsself een of ander tyd afgevra het. Miskien wonder jy dit nou nog.

Wat ons met ons lewens doen is so belangrik dat dit baie swaar in ons gedagtes en in ons gees kan weeg. Ons wil seker maak dat ons die regte besluite neem, ons wil regtig nie misluk nie en ons wil 'n impak maak. Soms voel ons dat ons 'n antwoord op die vraag nodig het — en ons wil dit NOU hê of het dit NOU nodig.

Wie gee ons egter daardie antwoord? Wie lei ons regtig om te kies wat ons persoonlike visie en missie vir ons lewens sal wees? Ek weet wat die “Christelike antwoord” is, maar wanneer ons diep en eerlik nadink oor hoe dit in ons lewens lyk, weet ons daar is ander invloede buite God wat 'n groot uitwerking kan hê op wat ons kies om met ons lewens te doen. Sommige van hulle is vanselfsprekend — gesin, vriende, mentors — maar ander is nie so duidelik nie — suksesvolle mense wat ons in die media sien, bure wat blykbaar alles het, invloedrykes of mense wat ons op sosiale media volg, selfs belangrike kwessies in die hoofopskrifte kan maak dat ons deel van 'n beweging wil word. Sommige hiervan kan raadsaam lyk of goeie bedoelings hê, maar ons kan soms op die harde manier leer dat net omdat dit "goed" klink, dit nie beteken dat dit wel God se wil vir ons lewens is nie.

Vandag se Skrifgedeelte herinner ons dat ons sy skepping is. As ons terugdink aan Genesis een, elke keer wanneer Hy iets geskep het, het Hy dit “goed” genoem. Toe tree sonde in en sy skepping was nie meer so “goed” nie. Dit het ons egter nie nutteloos gemaak nie! Soos ons in vandag se vers kan sien, is ons in “Christus Jesus só gemaak dat ons die goeie werke ... kan uitlewe” (Efesiërs 2:10 NLV). Die oorspronklike woord vir goed in hierdie vers in Grieks is agathos, wat beteken “aangenaam, nuttig, voortreflik, opreg, eerbaar, ens.” Dit is in pas met ons Messias, die een wat ons van ons sonde verlos, dat ons ons ware uniek-pasgemaakte doel of “goeie werke” kan vind wat “Hy vir ons bestem het, kan uitlewe.”

God maak nie altyd bekend wat sy groot planne vir ons is nie soos toe Hy vir Jeremia gesê het dat hy 'n profeet vir die nasies sal wees (Jeremia 1:5) of toe Dawid gesalf is (1 Samuel 16:13), dertien jaar voordat hy werklik koning geword het (2 Samuel 5:4).

Soms is dit 'n reis van een dag op 'n slag om te ontdek en te verstaan wat Hy vir jou voorberei het. Sy pad en doel is uniek net soos jy.

Pouse: Na wie se stem(me) soek en luister jy meer vir leiding as om God, jou skepper, te soek?

Oefening: Lees Romeine 8 en vra God om jou te help verstaan wat Hy vir jou probeer vertel oor jou doel in hierdie hoofstuk.

Bid: Liewe Here, soms bevraagteken ek hoekom ek is waar ek is of doen wat ek doen. Help my om U te soek bo enigiets of enigiemand anders en U en die pad wat vir my uitgelê is, te vertrou terwyl ek kies om hierdie lewe in Christus Jesus te wandel. Amen.