Heilige Emosies - Bybelse Antwoorde vir Elke UitdagingVoorbeeld

'n Kragtige manier om seker te maak jou gees groei tot die kragtigste deel van jou innerlike mens, is om sonder ophou te bid. Ek sê nie kerm aanhoudend nie. Ek sê bid sonder ophou.

So baie Christene bring hulle hele lewe lank by die Here deur te kla en te kerm en dan wonder hulle waarom hulle gebede nooit verhoor word nie. Wanneer jy bid, bid met vreugde! Wanneer jy bid, tree tot sy teenwoordigheid toe met vertroue en krag! Los jou emosies as jy bid en neem jou welgevoede gees na die Troonkamer en koester sy wonderlike teenwoordigheid!

God het jou lief wanneer jy kerm, maar wanneer jou siel een word met sy Gees in 'n pragtige simfonie van aanbidding, is dit die oomblik wanneer die hemel en aarde om jou ontwil begin beweeg. Ons as Christene is nie 'n mensegroep wat sang en vreugde tot 'n sonnige dag en manjifieke omstandighede beperk nie, maar ons is vasberade om met vreugde te bid selfs wanneer ons lewens uitmekaar val. Dit is deel van ons DNS [wese] om in sy teenwoordigheid met danksegging te kom, ongeag wat vir ons daar buite in die wêreld wag.

Die drie Hebreeuse jongmanne was in aanbidding binne-in die brandende oond! Paulus en Silas het teen middernag in die tronk gesing! Stefanus was in aanbidding terwyl hy gestenig is! Hanna was in aanbidding nog voor sy swanger was! Sluit aan by die menigte gelowiges in elke generasie deur die geskiedenis wat gekies het om met vreugde te bid.