Banal na mga Damdamin - Maka-Bibliang Tugon sa Bawat PaghamonHalimbawa

Nilikha ka ng Diyos na maging mayabong at patuloy na maging matatag. Ginawa ka Niyang may emosyonal at espiritwal na pananagana sa bawat panahon ng iyong buhay. Hindi Niya binalak na manguluntoy ang iyong damdamin at madaig ng galit at matinding kalungkutan at pag-aalala. Batid ng Diyos na kahaharapin nating lahat ang matitinding bagyo at karimlan na dulot ng ating kultura, subalit ang Kanyang malikhaing kakayahan ay nagbibigay-daan upang mapanatili ang ating ugnayan sa Puno ng Ubas sa kabila ng mga pagbabago sa buhay. Kalooban ng Diyos na yumabong ka sa bawat aspeto ng iyong buhay, kasama ang iyong emosyon!

Ang salitang "mayabong" sa Hebreo ay mayaman sa kahulugan at maraming gamit. Madalas na ito'y tumutukoy sa isang bagay o taong kamangha-mangha ang paglago. Ang "mayabong" ay isang salitang naglalarawan sa isang halamang tiyak na lalago nang husto anumang panahon o kahit sa tagtuyot.

Ipinahahayag ng Salmista na, "tulad ng palmera, ang taong matuwid tatatag ang buhay." Kung ginagamit ng Biblia ang salitang "matuwid" upang ilarawan ang isang tao, nangangahulugan ito na ang taong iyon ay kusang-loob na iniuugnay ang sarili niya sa Diyos. Kung gayon, ikaw ay yayabong ayon sa lalim ng iyong kaugnayan sa Diyos! Kung pipiliin mong manatili sa Kanyang presensya araw-araw at maglaan ng panahon para sa Salita at sa panalangin, ang buhay mo ay magiging isang maringal na larawan ng pag-unlad na nagmumula sa iyong pakikipag-ugnayan sa Diyos.

Maraming Cristiano ang mas malalim pa ang ugnayan sa kirot ng nakaraan kaysa sa katotohanan ng presensya ng Diyos sa kanilang pang-araw-araw na pamumuhay. May emosyonal na ugnayan sa iyo ang pagbabasa o hindi mo pagbabasa ng Biblia araw-araw. May emosyonal na ugnayan sa iyo ang pagsamba o di mo pagsamba sa kabila ng iyong kabiguan. May emosyonal na ugnayan sa iyo ang pananalangin para sa mga taong hindi naging mabuti sa iyo. Tunay na may halaga ang mga ito.

Kapag tama ang iyong pagpili, palalaguin ka ng Diyos! Magiging mabilis ang iyong paglago sa bahaging espiritwal at emosyonal sapagkat buhay ang iyong tinatanggap sa Diyos. Sa pamamagitan ng Banal na Espiritu, ikaw ay magkakaroon ng pag-uugali at katangian ng Diyos.

Kailangang kumilos ka kasama ang Diyos hanggang ang iyong emosyonal na tugon sa iyong mga kinakaharap ay bunga na ng malalim at mayamang pakikipag-ugnayan mo sa Kanya.