Naghihintay Dito Para sa Iyo, Isang Adbiyentong Paglalakbay ng Pag-asaHalimbawa

ANG DIYOS AY KUMIKILOS HABANG TAYO AY NAGHIHINTAY

PAGNINILAY

Kung tayo ay magsasabi ng totoo, ayaw natin ng naghihintay. Sa katunayan, kadalasan ay nasasabi natin ang ganito,“hindi ako makapaniwalang napakatagal nito, nauubos dito ang napakahalagang oras ko!” Ito ay dahil karamihan sa atin ay nag-iisip na ang paghihintay ay pag-aaksaya. Ngunit hindi ito totoo sa ating Diyos.

Ang Diyos ay kumikilos habang tayo ay naghihintay. Hindi mo man nakikita kung ano ang ginagawa Niya, ang Diyos ay laging nagsasaayos ng mga kaganapan sa langit at lupa upang matupad ang Kaniyang mga layunin para sa iyong buhay. Magtiwala sa Kanyang walang-hanggang pag-ibig—pag-ibig na nag-udyok sa Kanya na magpadala ng Tagapagligtas mula sa langit upang manumbalik ka at mailigtas ka. Ang mga plano ng Diyos para sa iyong buhay ay hindi mapipigilan. Maghintay nang may tiyaga, alamin na ang paghihintay ay hindi nasasayang kapag naghihintay ka sa Diyos.

PAGMUMUNI-MUNI

Halina Jesus na Matagal nang Inaasam

Halina Jesus na matagal nang inaasam
Isinilang upang palayain ang Iyong bayan;
Mula sa aming mga takot at kasalanan kami ay pakawalan,
Ipakita sa amin na sa Iyo ay may kapahingahan
Lakas ng Israel at kaginhawahan,
Ikaw ang pag-asa ng buong sangkatauhan;
Minamahal na Pagnanais ng bawat bansa,
Kagalakan ng bawat pusong umaasa.

Isinilang upang iligtas ang Iyong bayan,
Isinilang na bata datapuwat isang Hari,
Isinilang upang maghari sa atin magpakailanman,
Ngayon ay ibigay ang iyong kahariang maluwalhati.
Sa pamamagitan ng Iyong Espiritu na walang hanggan
Sa puso naming lahat ikaw ay nag-iisang maghari;
Sa pamamagitan ng Iyong sapat na kabutihan,
Itaas mo kami sa Iyong tronong maluwalhati.

Charles Wesley, 1707–1788

PANALANGIN

Ama, narito ako at naghihintay sa Iyo. Bukas ang aking puso at palad sa Iyong mga layunin at plano para sa aking buhay. Bigyan mo ako ng tiyagang lubhang kailangan ko at akayin mo ako sa aking paghihintay. Kung ang aking damdamin man ay wala pa roon, naniniwala ako na kumikilos ka para sa akin sa sandaling ito, kumakalinga, nagtatanggol, naghahanda, nagbibigay. Bigyan mo ako ng grasya upang manatiling nagtitiwala sa Iyo sa harap ng napakalakas na hangin ng pag-aalinlangan na umiihip sa paligid ko. Iangkla mo ang puso ko sa Iyo. Amen.