Soma Biblia Kila Siku 08/2020Mfano

Ezekieli alionyeshwa hukumu ya Mungu juu ya Israeli: Mungu anaondoka katika hekalu. 1.Mungu anaagiza hukumu ya moto katika mji. Biblia inasema ghadhabu ya Mungu juu ya uasi ni moto ulao. 2.Utukufu wa Mungu unaondoka katika patakatifu pa patakatifu ulipokuwa juu ya makerubi kwenye sanduku la agano (m.4: Utukufu wa Bwana ukapaa kutoka kwa kerubi yule, ukasimama juu ya kizingiti cha nyumba; nayo nyumba ikajazwa na lile wingu, na ua ulikuwa umejaa mwangaza wa utukufu wa Bwana). Makerubi ni viumbe wanaolinda na kuubeba utukufu wa Mungu. 3.Hatimaye utukufu unaondoka kabisa (m.18-19: Kisha huo utukufu wa Bwana ukatoka pale juu ya kizingiti cha nyumba, ukasimama juu ya makerubi.Nao makerubi wakainua mabawa yao, wakapaa juu kutoka katika dunia machoni pangu, hapo walipotoka nje, nayo magurudumu yakawa kando yao; wakasimama mahali pa kuingilia pa mlango wa upande wa mashariki wa nyumba ya Bwana; na utukufu wa Mungu wa Israeli ulikuwa juu yao.). Soma maneno yafuatayo ya Isa 55:6-7, na zingatia kwamba utukufu wa Mungu hauondoki ghafla:Mtafuteni Bwana, maadamu anapatikana, Mwiteni, maadamu yu karibu;Mtu mbaya na aache njia yake, Na mtu asiye haki aache mawazo yake; Na amrudie Bwana, Naye atamrehemu; Na arejee kwa Mungu wetu, Naye atamsamehe kabisa.