Ura për te MarkuShembull

Lebrosi i pastruar

Lebra është një sëmundje e cila e bren dhe shkatërron trupin e njeriut. Njerëzit me lebër humbasin gjymtyrët e tyre, gishtërinjtë e dorës dhe të këmbës, hundën e veshët. Një burrë me lebër nuk ishte vetëm i sëmurë, ai ishte edhe i papastër. Kjo nuk do të thoshte se ishte fizikisht i papastër. Për më tepër, sipas ligjeve të Perëndisë, ai nuk lejohej të qëndronte as në shtëpi dhe as në kishë. Askush nuk lejohej ta prekte. Edhe nëse ishte i martuar dhe kishte fëmijë, ai nuk mund t’i përqafonte dhe as të përqafohej prej tyre. Kjo ishte një jetë shumë e vetmuar. Zoti e kishte urdhëruar këtë për të na dhënë një tablo, e cila tregon se çfarë na shkakton mëkati. Jeta e një lebrosi është një tablo krejt e zbehtë e ferrit. Ai është një vend i vetmuar, përplot me vuajtje, ku askush, asnjëherë, nuk do t’ju japë një përqafim! Një vend ku ndihet vetëm zemërimi i Perëndisë.

Mëkatet tona janë si lebra; ato na kanë shkualifikuar, na kanë bërë të papërshtatshëm për shtëpinë e Perëndisë (parajsën), si dhe për të qenë së bashku me Kishën e Perëndisë në parajsë. Vetëm Zoti Jezus mund të na e heqë këtë “papërshtatshmëri”. Vini re: Ai e preku atë njeri. Me atë prekje, Ai në të vërtetë po deklaronte: “Unë jam i përgatitur të bëhem si ju, në lebrën tuaj, jam i gatshëm të zë vendin tuaj. Unë do të jem zëvendësuesi juaj”. Ne mund të shpëtohemi nga Zoti Jezus, vetëm kur Ai zë vendin tonë. Ungjilli deklaron se Jezu Krishti është i gatshëm të marrë vendin e mëkatarit.

Ashtu si efektet e lebrës, që e përçudnonin njeriun, ashtu janë edhe efektet e mëkatit. A e kuptoni se si mëkati e shëmton zemrën tonë? Të qenët egoist është një gjë e shëmtuar. Të qenët krenar, po ashtu. Të gjitha ato mëkate na bëjnë të papastër.A ndieni diçka nga “lebra” e mëkatit? Nëse jo, përkulni gjunjët para Zotit dhe kërkojini t’ju bëjë të ndjeshëm ndaj saj. Lexoni Fjalën e Perëndisë për të kuptuar se në çfarë mënyrash jeni një “lebros” frymëror. Por, nëse e ndieni barrën e mëkatit, atëherë shkoni edhe ju te Zoti si ai lebros. Kërkojini Atij t’ju bëjë të pastër. Ungjilli deklaron se Jezu Krishti është i gatshëm t’ju pastrojë dhe se Ai ka zënë vendin e mëkatarit.