Ura për te MarkuShembull

Një predikues i mrekullueshëm

Gjon Pagëzori u dërgua nga Perëndia për t’i përgatitur njerëzit për ardhjen e Zotit Jezus; ai e bëri këtë duke u predikuar njerëzve se ishin mëkatarë. Neve nuk na pëlqen kur dikush na i vë në dukje mëkatet. Megjithatë, duhet të jeni mirënjohës në qoftë se Perëndia ka vendosur njerëz të tillë në jetën tuaj. Pse? Sepse kjo është mënyra e Zotit për të na bërë të kuptojmë nevojën tonë për Birin e Tij, Jezu Krishtin. Nëse asnjëherë nuk jeni të shqetësuar nga mëkatet në zemrën tuaj, atëherë ka diçka që nuk shkon! Kjo do të thotë që zemra juaj është ende e humbur dhe e vdekur. Lutuni sot që Perëndia të bëjë që të ndieni peshën e mëkateve tuaja.

Vini re, njerëzit i rrëfyen mëkatet e tyre. Është shumë e rëndësishme të kuptojmë se Perëndia kërkon që t’i rrëfejmë mëkatet tona, përpara se të kërkojmë falje. T’i rrëfesh mëkatet është shumë më e vështirë sesa të kërkosh falje. Ne të gjithë e kemi më të lehtë të themi: “Më vjen keq!”, në vend që të shkojmë te personi ndaj të cilit kemi mëkatuar, për t’i thënë: “Më vjen keq që kam qenë aq i pasjellshëm, duke ju bërtitur! A mund të më falni, ju lutem?”. Këtë kërkon Perëndia prej nesh. Ne duhet t’ia rrëfejmë mëkatin tonë personit ndaj të cilit kemi mëkatuar, ashtu si edhe Perëndisë. Ndaloni dhe mendoni për një çast për mëkate të veçanta që kujtoni nga dita e sotme ose e djeshmja. A keni qenë të sjellshëm dhe të gatshëm për të bërë punët tuaja të përditshme? A keni qenë gjithnjë të drejtë? A keni qenë nderues ndaj Perëndisë në lutjet tuaja? A jeni inatosur ndaj ndonjë vëllai apo motre, për shkak se nuk ju kanë kënaqur me sjelljen e tyre? Zoti Jezus thotë se kjo është njëlloj sikur t’i vrasësh. Ne duhet t’ia rrëfejmë këto mëkate Perëndisë; dhe nëse kemi mëkatuar kundër dikujt, me këtë rrëfim duhet të shkojmë edhe tek ai person.