In Hom Is Ek SterkSample

GELOOF IS MEER AS ’N SUIKERLAGIE

“We have not journeyed all this way because we are made of sugar candy!” Hierdie woorde van Winston Churchill is ook vandag waar vir ons as volgelinge van die Here Jesus. Ons is nie “softies” nie. Die Here se liefde laat ons nie naïef op ’n wolk van geluksaligheid rondsweef nie. Ons voete raak elke dag goeie grond te midde van die seer en swaar van onreg, dood, worstelinge en nuwe uitdagings hier rondom ons.

Ons volg dus die Here in die regte lewe. Ons weet dit kos moed om elke dag te kies om in Hom te glo. Ons weet dit kos leeuemoed om nie saam met almal in die stroom van woede en ontevredenheid meegesleur te word nie. Ons kies egter oor en oor hierdie pad, en ook vandag weer omdat ons weet die Here is by ons. Ons is swak, maar tog sterk. Ons is weerloos, maar tog weerbaar. Ons is breekbaar, maar tog dapper. Ons is oor raad verleë, maar nie radeloos nie. Ons volg die Een wat sy kruis enduit gedra het. Ons is hier om die pad saam met die Here Jesus te voltooi. Ons gaan nie smelt nie.