Vertrou God Te Midde Van SwaarkrySample

Lees: Psalm 51

SOAP: Psalm 51:19

Die offer wat U wil hê, o God, is verootmoediging:

U sal ’n hart vol ootmoed en berou nie gering ag nie, o God.

Oordenking

In vandag se Bybelvers sien ons dat God geen offers of brandoffers begeer nie. Al wat Hy begeer is verootmoediging–’n nederige en berouvolle hart. Ons nederige harte is die offer wat Hy begeer.

Dawid, die skrywer van hierdie Psalm, het besef dat dit makliker is om brandoffers te bring as ’n nederige hart. Hy het ook besef dat, om werklik diepe gemeenskap met die Here te ervaar, die soort wat ’n vermoeide siel sal bevredig, dít waarna ons almal smag, mens se hele wese na God alleen moet smag. Om opoffering sonder berou te bring, is soos om iemand te komplimenteer, terwyl ons die persoon eintlik in stilte kritiseer. Hierdie twee dinge gaan nie saam nie, en hoeveel te meer is dit waar met ons God wat “nie dinge sien soos mense sien nie. Mense kyk na die uiterlike, maar die Here kyk na die hart” (1 Samuel 16:7).

Ons kan almal voel dat ons hart met tye gebreek is. Hierdie is die oomblikke wanneer die boek van Psalms vir ons ’n groot troos word, wat ons ’n taal bied vir ons eie pyn en gebrokenheid. Of dit nou ’n vorm van onreg is wat ons persoonlik ervaar het, voortdurende lyding wat ons sien gebeur aan die ander kant van die wêreld, of weeklaag oor ons eie sonde is, ons kan gebroke en verneder voel tot die punt waar ons geen hoop meer het nie.

Psalm 51 herinner ons egter aan die hoop wat ons in Jesus het wanneer ons ons versoeke en harte aan die Here onderwerp. Christus het nooit ’n maklike lewe belowe nie, maar Hy belowe wel sy teenwoordigheid en hulp terwyl ons deur beproewings gaan. God sal nooit ’n hart wat na waarheid soek, ’n nederige gees wat antwoorde soek, en ’n berouvolle hart wat vergifnis benodig, verwerp nie.

Ons leer elke dag van hierdie studie dat Bybelse weeklaag insluit om te onthou wat ons weet wat waar is. Ons kan net die waarheid ken wanneer ons ons elke dag na die Here en sy Woord wend en dit bietjie vir bietjie in ons harte en gedagtes bêre. Waarom nie vandag ’n oomblik neem om na te dink oor sommige van die goeie en wonderlike dinge wat God vir jou in jou eie lewe gedoen het nie? Skryf dit dan neer, sodat wanneer die volgende tyd vir jou aanbreek om te weeklaag, dit makliker is om te onthou wat jy weet wat waar is. As God jou al voorheen gehelp het, sal Hy dit verseker weer doen.