kykNET Lydenstyd Gids 2023Sample

Voorbereidingsweek: Die Woord

Genoeg.

Hierdie paar woorde is genoeg.

Indien nie hierdie woorde nie, dan hierdie asem.

Indien nie hierdie asem nie, dan hier waar ek sit.

Hierdie opening vir die lewe

Wat ons van die hand gewys het

Weer en weer

Tot nou toe.

"Enough" deur David Whyte
(Vrye vertaling)

"Totdat ek kom, moet jy jou daarop toelê om uit die Skrif voor te lees …" 1 Timoteus 4:13 AFR83

"Dit gaan goed met die mens wat nie die raad van goddeloses volg nie, nie met sondaars omgaan en met ligsinniges saamspan nie, maar wat in die Woord van die Here sy vreugde vind, dit dag en nag oordink. Hy is soos 'n boom wat by waterstrome geplant is, wat op die regte tyd vrugte dra en waarvan die blare nie verdroog nie. Hy is voorspoedig in alles wat hy aanpak" Psalm 1:1-3 AFR83.

Daar is iets besonders omtrent die Bybel. Die Bybel word die heilige Skrif genoem. Heilig beteken afgesonder. Dis anders as al die ander boeke waarmee jy te doen sal kry. Deur die eeue is die Bybel die bron om gelowiges te voed, te stimuleer, in stand te hou, te lei, en te laat groei.

Tydens hierdie reis word jy genooi om elke week met dankbaarheid te leef en ‘n verhaal uit die Skrif te beleef. Wat belangrik is, is om nie net met jou logiese, rasionele denke met daardie woord om te gaan nie. Ons lees die Skrif herhaalde kere. Deur so te lees begin jy dit bepeins. Jy dink daaroor na. Jy gaan na jou innerlike funksies — jou intuïsie — ‘n manier van lees tydens die vroeë kerk wat die Skrif van die kop na die hart neem.

Doen dit:

Lees vandag se Skrifgedeelte.

Wat voel jy? Wat gebeur in jou as jy die Skrif lees? Waarna nooi God jou deur hierdie woorde?

Gebed om te herhaal:

Here, gee my die genade om u Woord te ontvang.