കരുത്തോടെയും ധൈര്യത്തോടെയും ജീവിക്കുക!ഉദാഹരണം

"സ്വർഗ്ഗീയ സ്ഥാനപതി - പരിശുദ്ധാത്മാവ്"

ഒരു ഗവൺമെന്റിന്റെ ഔദ്യോഗിക പ്രതിനിധിയായ ഒരു സ്ഥാനപതി, മറ്റൊരു ഗവണ്മെന്റിന്റെ ജനങ്ങൾക്കിടയിൽ ജീവിക്കാനും സമാധാനത്തിന്റെയും നല്ല ഇച്ഛാശക്തിയുടെയും ഒരു ദൗത്യം നിറവേറ്റാനുമായി അയയ്ക്കപ്പെടുന്ന വ്യക്തിയാണ്. താൻ പ്രതിനിധീകരിക്കുന്ന ഗവൺമെന്റിന്റെ അധികാരവും ഔദാര്യവും വിഭവങ്ങളും ഉപയോഗിച്ച് അവൻ തന്റെ കടമകൾ നിറവേറ്റുന്നു. അവനിൽ അർപ്പിതമായ വിശ്വാസത്തോടെ, അവൻ തന്റെ ഉദ്ദേശ്യം അന്തസ്സോടെയും പൂർത്തീകരണത്തോടെയും നിറവേറ്റുന്നു.

വിവിധ നിലകളിൽ, പരിശുദ്ധാത്മാവിന്റെ ദൗത്യം സ്വർഗത്തിൽനിന്നുള്ള ഒരു സ്ഥാനപതിയുടെ ദൗത്യത്തോട് സാമ്യമുള്ളതാണ്. പരിശുദ്ധാത്മാവ് ദൈവത്തിന്റെ എല്ലാ അധികാരവും ശക്തിയും വിഭവങ്ങളും ഉൾക്കൊള്ളുകയും, ദൈവിക സാന്നിധ്യത്തിലൂടെയും പ്രവൃത്തിയിലൂടെയും ഭൂമിയിലുള്ള ഓരോ വ്യക്തിയോടും ദൈവസ്നേഹം പ്രകടിപ്പിക്കുകയും വെളിപ്പെടുത്തുകയും ചെയ്യുന്നു.

തന്റെ ശിഷ്യന്മാരോടൊപ്പമുള്ള യേശുവിന്റെ സമയം അവസാനിക്കാറായപ്പോൾ, താൻ പോയശേഷം അവർ ഒറ്റപ്പെട്ടുപോകയില്ലെന്ന് അവൻ അവരോട് പറഞ്ഞു. അവരോടൊപ്പം ഉണ്ടായിരിക്കാനും അവർക്ക് വഴികാട്ടാനും അവരെ പഠിപ്പിക്കാനും അവരെ ആശ്വസിപ്പിക്കാനും നയിക്കാനും തന്റെ സ്ഥാനത്ത് അയയ്ക്കപ്പെടുന്ന ഒരാളെക്കുറിച്ച് – അതായത് പരിശുദ്ധാത്മാവിനെക്കുറിച്ച് - അവൻ അവരോട് പറഞ്ഞു. യേശു പറഞ്ഞു:

"ഞാൻ പോകാഞ്ഞാൽ കാര്യസ്ഥൻ നിങ്ങളുടെ അടുക്കൽ വരികയില്ല; ഞാൻ പോയാൽ അവനെ നിങ്ങളുടെ അടുക്കൽ അയക്കും." യോഹന്നാൻ 16:7

ഭൂമിയിലെ യേശുവിന്റെ വേല പൂർത്തിയായ ശേഷം, അവൻ മടങ്ങിവരുന്നതുവരെ അവന്റെ സ്ഥാനത്ത് നമ്മോടൊപ്പം ഉണ്ടായിരിക്കാൻ അവൻ പരിശുദ്ധാത്മാവിനെ അയച്ചു. പരിശുദ്ധാത്മാവ് നമ്മുടെ ജീവിതത്തിന് മാർഗനിർദേശവും നേതൃത്വവും ആശ്വാസവും ഉപദേശവും നൽകുന്നു. യേശു തന്റെ ശിഷ്യന്മാരോട് പരിശുദ്ധാത്മാവിനെ കുറിച്ച് ഇപ്രകാരം വിവരിച്ചു:

"എങ്കിലും പിതാവു എന്റെ നാമത്തിൽ അയപ്പാനുള്ള പരിശുദ്ധാത്മാവു എന്ന കാര്യസ്ഥൻ നിങ്ങൾക്കു സകലവും ഉപദേശിച്ചുതരികയും ഞാൻ നിങ്ങളോടു പറഞ്ഞതു ഒക്കെയും നിങ്ങളെ ഓർമ്മപ്പെടുത്തുകയും ചെയ്യും." യോഹന്നാൻ 14:26

പരിശുദ്ധാത്മാവിന്റെ രൂപത്തിൽ ദൈവിക സാന്നിധ്യം ഇന്ന് നമ്മോടൊപ്പമുണ്ട്, അവൻ നമ്മുടെ ലോകത്തിലും നമ്മുടെ ജീവിതത്തിലും സജീവമായി പ്രവർത്തിക്കുന്നു.