Fahafahana misafidy malalaka

Ny fanaovana safidy dia azo lazaina ho sarotra ihany. Satria, sady mino ianao fa manana planina ho an'ny fiainanao Andriamanitra. Kanefa anao ihany ny safidy.

Nomen'Andriamanitra antsika ny fahafahana mandray fanapahan-kevitra malalaka sy ny fanatanterahana ny hetsika rehetra.

Tian'Andriamanitra ianao hiaina araka izay sitrapony. Kanefa tiany raha mba tena avy amin'ny sitraponao no anaovanao izany.

Tiako izany fomba fisainana izany, hoe tsy efa voalahatr'Andriamanitra mialoha toy ireny vy kinga (robot) sasany ireny akory isika. Nomen'Andriamanitra antsika ny saina ahafahantsika manao ny safidy rehetra araka izay mety amintsika.

Etsy andanin'izany dia andraikitra ihany koa izany. Raha tena te hiaina araka ny sitrapon’Andriamanitra isika, dia mila mifanaraka tanteraka amin’Andriamanitra, ary ny Fanahy izay mitoetra ao anatintsika. Afaka misafidy amin’ny fahafahana hanao ny sitrapon’Andriamanitra isika amin’izay. Amin'ny maha zanak'Andriamanitra anao dia manana fahalalahana sy fahafahana ny manandrana izay fomba rehetra maha afa-po anao mandrapahitanao ny safidy mifanaraka amin'ny fiainanao ianao.

Mety handray fanapahan-kevitra tsara na ratsy ihany koa ianao. Soa anefa fa eo an-tanan'Andriamanitra foana ny vokatr'izany. Manantena aho fa hampitombo ny fahatokiana ao aminao amin'ny fanaovana safidy izany, satria izay rehetra mety ho fanahiana sy fisalasalana mitsiry ao anatinao dia tsy avy amin'Andriamanitra. "Fa isika tsy mitolona amin'ny nofo aman-drà, fa amin'ny fanapahana sy amin'ny fanjakana sy amin'ny mpanjakan'izao fahamaizinana izao, dia amin'ny fanahy ratsy eny amin'ny rivotra." (Efesiana 6:12).

Efa nisy fotoana tokoa aho nandray fanapahan-kevitra diso. Tsy nifanaraka tamin'ny izay fanirian'Andriamanitra ho ahy izany. Potika tanteraka nefa ve ny fiainako avy eo? Tsia, niainako ny vokatr'izany, kanefa soa ihany, noho ny fitiavan'Andriamanitra sy ny famindram-pony dia tsy navelany nandeha tamin'izao fotsiny aho.

Ny fahafahana dia ao amin'ny ivon'ny Baiboly, amin'izany no itiavan'Andriamanitra hanehoana amintsika ny fomba tokony iainana mba ahatonga antsika ho ambinina amin'ny maha olombelona antsika. Ary satria Izy no namolavola antsika, dia fantany araka izany, izay fomba tsara indrindra ahafahantsika miaina am-pifaliana sy an-kahalalahana. Matetika Izy no mampiseho izany ao amin'ny Baiboly. Te hanafaka ny vahoaka amin'ny tsy rariny, ny fanagejana, ny tahotra ary ny fanamelohan-tena Izy.

Izany indrindra no antony ahafahanao manao ny safidinao: amin'ny alalan’ny fahafahana ao amin'i Jesosy, miaraka amin'ny fanampian'ny Fanahy Masina ary ny fankatoavana an'Andriamanitra. Dia ho itanao ny fahaizanao misafidy hanakaiky Azy, izay loharanon'ny fahavelomanao, mpanoratra ny fiainanao.

Fanontaniana: Efa diso safidy ve ianao ary ahoana no nahatonga izany ho tsara indray taty aoriana?