Fandraisana fanapahan-kevitra

Hianatra momban’ny "Toe-karena” sa momban’ny “Psikolojia" aho? Andeha ho any am-piangonana aho sa tsia? Mety hoe miaraka amin'olona tsy mino an'Andriamanitra ianao dia misalasala ny hanoy izany fiarahana izany.

Maro ireo safidy ataonao isan'andro. Misy ny safidy kely toy ny hoe hanao fanazarana ra-alina toy izay hitsotsotra. Indraindray koa anefa dia tojo safidy izay hamaritra ny hoavinao ianao. Ireny safidy rehetra ireny dia mety hahatonga anao ho very hevitra mihitsy. Ahoana no ahalalanao ny safidy tena tokony ho raisinao? Manontany tena ianao hoe: “inona no tian'Andriamanitra hataoko?" Mety ihany koa hoe matahotra ianao sao handray fanapahan-kevitra diso. Na koa tena tsy hahafahanao manao na inona na inona ny fisalasalanao.

Ny Baiboly anefa dia mampianatra antsika izay tokony ho ataontsika rehefa misy fanapahan-kevitra tokony ho raisintsika. Ohabolana 16:3 "Ankino amin'i Jehovah ny asanao, Dia ho lavorary izay kasainao."

Nisy fotoana aho niatrika fanapahan-kevitra tena sarotra. Nangataka torohevitra tamin'olona samihafa aho tamin'izany saingy samy nanana ny heviny izy ireo. Vao may naha-very hevitra ahy izany. Natahotra ny ho diso safidy aho. Ny safidy tsara indrindra noraisiko anefa dia ny fandraisana fanapahan-kevitra miaraka amin' Andriamanitra. Araka izay voalaza ao amin'ny Ohabolana 3:6, "Maneke Azy amin'ny alehanao rehetra..." Izay midika ho fampidiranao an'Andriamanitra an-tsehatra sy fanekenao ny maha Izy Azy, ary ny fanankinanao Aminy izay safidy tokony ho raisinao.

Fantatr'Andriamanitra ny antsipiriany momba anao. Fantany izay ao am-ponao. Ny Salamo 139 no milaza amintsika izany. Tiany ianao hampandray anjara Azy ao anatin'ny fanapahan-kevitrao. Te ho eo anilanao Andriamanitra, te hibanjina ny ho avy miaraka aminao Izy. Mikatsaka ny tsara indrindra ho anao Izy. "Fa Izaho mahalala ny hevitra iheverako anareo, hoy Jehovah, dia hevitra hahatonga fiadanana, fa tsy loza, mba hanome anareo fanantenana ny amin'ny farany.", hoy Ny Tompo ao amin'i Jeremia 29:11.

Mila manana fahendrena ianao ahafahanao manao ny safidy tsara amin'ny fiainanao. Zarao amin'Andriamanitra ny ao am-ponao sy ny ao an'eritreritrao. Dia hanana topi-maso amin’izay fomba fandraisana safidy ianao. Toa an'i Solomona mpanjaka izay nandray fanapahan-kevitra. Nangataka fahendrena sy fahalalana tamin'Andriamanitra izy ary nandray izany, mihoatra lavitra noho izay efa nangatahiny no azony.

Fanontanina : Inona no fanapahan-kevitra tokony ho raisinao anio? Ahoana ny ampidiranao an-tsehatra an'Andriamanitra ao anatin'izany safidy izany?

Fanamarihana :

Ny lahatsoratra amin'ity vakiteny ity dia avy ao amin'ny mailaka isan'andro Fahagaga isan’andro. Raha te hahazo mailaka isan'andro ianao dia manasa anao hisoratra anarana ao amin'nyFahagagana isan’andro