Ahoana ny fomba iresahan'Andriamanitra aminao?

Efa namaky ny Ohabolana 16:1 isika "Ny fikasan'ny fo no amin'ny olona; Fa ny famalian'ny lela dia avy amin'i Jehovah". Afaka miandany amin'ny tenanao ianao dia manao safidy araka izay fahazonao azy, fa raha mandeha amin'ny tenanao irery ihany ianao dia tsy ho vitanao izany. Mila an'Andriamanitra ianao. Fa ahoana nefa ny fomba iresahan'Andriamanitra aminao? Dia ahoana ny fomba hamaliany anao?

Andriamanitra dia miresaka amintsika amin'ny fomba maro tsy voaisa. Amin'ny alalan'ny nofy, fahitana, teny ao amin'ny Baiboly, sary, hira, eritreritra ary amin'ny alalan'ny Fanahy Masina. Mila fahaizana manavaka ianao ahafahanao mamantatra ny feon'Andriamanitra.

Misy ohatra tsara be ao amin'ny Baiboly mikasika ny famantarana ny feon'Andriamanitra. Samoela kely dia nanompo an'Andriamanitra tao an-tempoly. Indray alina izay dia nianatra namantatra ny feon'Andriamanitra izy. Taitra tao anatin'ny torimasony izy satria toa naheno feon'olona niantso ny anarany. Efa niverina in-telo ilay feo izay i Samoela vao tonga saina fa Andriamanitra no miantso Azy, itantsika ao amin'ny 1 Samoela 3 izany.

Mbola misy ohatra maro hafa ao amin'ny Baiboly. Niresaka tamin'i Mosesy tamin'ny alalan'ny kirihitra nirehitra Andriamanitra, itantsika ao amin'ny Eksodosy 3 izany.

Niresaka imbetsaka tamin'i Abrahama ihany koa Andriamanitra. Dia nentiny nivoaka teo ivelan'ny lay izy ka nilaza taminy hoe: “Jereo ange ny lanitra, ka isao ny kintana, raha mahisa azy ianao."

Mbola miteny foana Andriamanitra hatramin’izao, amin'ny fomba maro isan-karazany. Raha manana fifandraisana Aminy ianao, dia afaka matoky Azy fa hitantana anao Izy.

Manao ahoana ny fifandraisanao amin'Andriamanitra? Raha mamaky Baiboly ianao, mivavaka mandrakariva ary manome toerana ho an' Andriamanitra eo amin'ny fiainanao, dia hanana fifandraisana Aminy ianao ary hanome Azy alalàna hitarika ny fiainanao. Fony aho mbola zaza, dia nianatra nihira ny Salamo 25 tany am-pianarana, "Ray ô, ampahafantaro ahy ny lalanao, amin'ny alalan'ny Teninao sy Fanahinao".

Rehefa nanoloana safidy sarotra aho, dia satriko ery raha mba tonga dia nahazo toro-lalana mazava tamin'ny taratasy avy any an-danitra aho. Saingy tsy nety tonga mihitsy izany taratasy izany. Ary tsy nandre feo mba nilaza izay tokony ho nataoko aho. Namaky ny Baiboly aho, nivavaka aho, dia napetrako tamin'Andriamanitra ny fiainako. Tamin'izany fifandraisana izany no nahafahako nandray fanapahan-kevitra. Tsy voatery ho nifanaraka tamin'izay ny fihetseham-poko anefa. Fa nahatsapa fiadanana aho ary indraindray Andriamanitra nanome sopapa (paika) izay nampahery ahy mba hanoy ilay lalana izay efa nizorako io.

Noho izany dia te ampahery anao amin'izay voalaza ao amin'ny 1 Jaona 3:22 hoe: "Ary na inona na inona no angatahintsika dia raisintsika aminy, satria mitandrina ny didiny sy manao izay ankasitrahana eo imasony isika."

Zavatra atao: Maka fotoana hiainoana ny feon'Andriamanitra sy hamantarana hoe ahoana no hitondrany anao.