Mampitafy fahombiazana anao ny vavaka 👗👔

Fantatrao ve fa mampitafy anao hiatrika sedra na fahafahana iray hivoarana ny vavaka? Ny fiainana tsy misy vavaka dia hamela anao ho menatra, mitanjaka ary osa.

Ny zafikeliko, Luke, dia naniry foana ny handeha ho any Frantsa miaraka amin'ny raibeny. Ka azonao an-tsaina angamba ny hafaliana tsapanay rehefa tanteraka izany. Niresaka momba ireo toerana tianay hozahana izahay : ny Tour Eiffel, ny Arc de Triomphe ary ny Louvre. Nandeha nijery lalao baolina kitra koa izahay tao anaty hatsiaka niaraka tamina mpankafy efa ho 80.000 sady nihoraka mafy tamin'ny fonay manontolo. Soa fa nisy namako nampitandrina ahy ny amin'ny toetr'andro mangatsiaka, dia mba efa tsara fiomanana izahay.

Efa sendra ratsy omana tamina toetr'andro ratsy ve ianao, na koa fivoriana lehibe? Ahitana fanoharana mampitolagaga ao amin'ny Baiboly mikasika ny fitafiana izay milaza hoe “Koa mitafia famindram-po sy fiantrana, fahamoram-panahy, fanetren-tena, fahalemem-panahy, fandeferana,” (Kolosiana 3 : 12)

Mila miomana ho amin'ny toetr'andro avokoa isika, ary mitafy mifanaraka amin'izany. Fa mila mahatsapa tena koa isika fa ny fomba amam-panao ihany koa dia akanjo tafintsika. Niteny foana aho matetika hoe “mahatsapa antsika aloha ny olona, izay vao maheno antsika.” Mahavariana ahy mihitsy hoe ny ankamaroantsika dia mandany fotoana hanomanana ny akanjo, volo sy manjamaso, saingy manao tsinontsinona ny tena anatintsika. Matetika dia mandeha manatrika fivoriana amim-pitanjahana isika, ara-pihetseham-po sy ara-panahy. Ny vavaka no afaka hanitsy ny fomba amam-panao sy ny fanahinao.

Te hamporisika anao aho mba hanaraka ahy, ndeha hianatra hitafy ny toetra mendrika sy fanahy hendry isika mialohan'ny hanombohana ny andro tsirairay. Atombohy amin'ny vavaka izany. Mitariha koa namana mba hiaraka hivavaka, sy hitafy famindram-po sy fiantrana, fahamoram-panahy, fanetren-tena, fahalemem-panahy ary fandeferana.

Ireto misy dingana telo nandaitra tamiko:

1. Esory ny ratram-po, ny hatezerana, ny fialonana, ary ireo endrika tsy fahampiana rehetra. Esory isan'andro izay "fako" ara-pihetseham-po.
2. Meteza ho fenoin’ny Fanahy Masina. Avelao Izy hitsabo anao, hameno anao ary hampahery anao.
3. Omano tsara ny ao anatinao. Aza manomboka ny andronao raha mbola mitanjaka ara-panahy sy ara-pihetseham-po.

Tsarovy lalandava fa nokolokoloina ho Fahagagana ianao, ka aza avela hanakana anao tsy hiaina Fahagagana feno ireo fako amin'ny fiainanao. Satria ianao dia Fahagagana.

Ny namanao, Paul Marc Goulet