Inona no mitranga amin'ireo vavakao tsy voavaly?

Efa nisy vavakao ve ka tsy voavaly? Ahoana ny fahatsapanao izany? Mahafantatra olona aman-jatony aho izay very hevitra noho ny amin'ireo vavaka toa tsy misy valiny.

Tamin'ny vao nanomboka nanolo-tena ho kristianina aho dia nanana Finoana natanjaka be an'Andriamanitra. Nahavita zava-tsoa goavana sy maro be tamin'ny fiainako Izy tao anaty taona vitsivitsy monja ka lasa adalan’ny finoana aho. Nafana fo be aho nivavaka. Tsy adinoko mandrakizay ilay andro iray nizahan-toetra ahy. Tamin'izay aho nitondra ny fofom-badiko sy ny havany nandeha fiara, lany ny solika. Niandry fahagagana ny rehetra ary izaho nivavaka tamin'ny Ray mba hameno ny solika amin'ny fomba tsy takatry ny sain’olombelona. Niandry izahay ka niandry, sady nandramako novelomina imbetsaka ny fiara, saingy tsy nandaitra mihitsy. Voatery niatrika izay fahaverezan-kevitra izay aho : ahoana no atao raha tsy mivaly araka ny antenaina ny vavaka natao?

Na dia tsy nameno solika araka ny nangatahiko aza Andriamanitra, nisy sampandraharaha manokana nanavotra anay tamin'ny solika maimaimpoana. Namaly ny vavako tamin'ny fomba hafa Andriamanitra? Mbola fahagagana ve izany?

Zaraiko izay tantara tsotra izay satria lasa fototra manampy ahy mba hahafantatra tsara ny amin'Andriamanitra sy ny asan'ny vavaka. Ireto misy Tenin'Andriamanitra mahafinaritra anankiroa momba ny vavaka “Koa mifaneke heloka ianareo, ary mifampivavaha, mba ho sitrana ianareo. Ny fiàsan'ny fivavaky ny marina dia mahery indrindra.” (Jakoba 5 : 16) sy “Ary lazaiko aminareo koa: Raha misy roa aminareo mifanaiky ety ambonin'ny tany na amin'inona na amin'inona ka hangataka izany, dia ho azony avy amin'ny Raiko Izay any an-danitra izany.” (Matio 18 : 9)

Te hanoro anao fomba vitsivitsy hiatrehana fahaverezan-kevitra amin'izay vavaka tsy voavaly aho:

1. Zavatra tsy izy ve no nangatahinao?
2. Mamaly ny vavakao amin'ny fomba hafa ve Andriamanitra?
3. Mila vavaka fanohanana avy amin'olona hafa ve ianao?
4. “Tsia” ve ny valiny?
5. Nahemotry ny hery tsy hita maso ve ilay valim-bavaka?

Mino aho fa mamaly ny vavaka ataontsika foana Andriamanitra, fa indraindray isika no sahirana manakatra izay mety ho hevitry ny valiny omeny. Aza mitsahatra mivavaka fa izay no mahatonga anao ho Fahagagana.

Ny namanao, Paul Marc Goulet