ATAOVY HO LAHARAM-PAHAMEHANAO LEHIBE INDRINDRA NY DIDIN'I JESOSY FARANY

koa mandehana ianareo, dia ataovy mpianatra ny firenena rehetra, manao batisa azy ho amin'ny anaran'ny Ray sy ny Zanaka ary ny Fanahy Masina sady mampianatra azy hitandrina izay rehetra nandidiako anareo; ary, indro, Izaho momba anareo mandrakariva ambara-pahatongan'ny fahataperan'izao tontolo izao. -Matio 28:19-20 MG1865

Antsoina matetika hoe Ny Iraka Lehibe ireo andininy ireo, satria naniraka antsika Andriamanitra hoe: “mandehana ianareo, dia ataovy mpianatra ny firenena rehetra”. Noraketin'i Matio fa ireo no teny farany nolazain'i Jesosy talohan'ny niakarany tany an-danitra.

Moa ve tsy manan-danja lehibe foana ny teny farany lazain’ny olona iray? Raha misy olona manoratra sitrapo farany sy testamenta, dia mandrakitra an-tsoratra ny toromarika sy ny fahatsiarovany farany izy. Moa tsy ireo teny ireo no tena tsy hadinontsika?

 Rehefa nodimandry ny reniko, dia tamin’ny andron’ny fetin’ny faha-50 taonako. Nanomana fety mahafinaritra ho ahy niaraka tamina namany maro i Nick, ary teny an-dalana hody aho no nahatsikaritra antso tsy voaray maro be avy tamin’i Andrew anadahiko, ary nisy simaiso tsotra hoe: “Maty i Neny.” Tena velom-pankasitrahana aho ary tsy ho hadinoko mihitsy ny tamin'ny nanampian'ny anadahiko iray George azy nanao FaceTime tamiko ny androtr'iny. Nolazaiko azy mantsy fa hiantsoa azy aho aorian'ny fety ary omeko tatitra feno momba ny fahafinaretana rehetra. Ho ankamamiako foana ny fahatsiarovana farany ananako momba azy—mijery ny endriny, mahita ny tsikiny mamy ary mandre ny teny farany nataony tamiko hoe: “Tiako ianao.”

Ahoana moa no tsy hankamamiako ny teny farany nataony?

Efa nisy olona nanome teny farany anao ve? Inona no hataonao raha misy toromarika ao amin’ireo teny farany ireo? Ahoana raha toa ka misy fiangaviana toy ny hoe: “Tandremo ny rahalahinao” na hoe “Tandremo ny reninao, ho ahy”? Moa ve izany fangatahana izany tsy ho lasa iraka eo amin’ny fiainanao? Moa ve tsy ho lasa laharam-pahamehana lehibe indrindra izany fangatahana izany?

 Tsy izao ve no fotoana tokony hanaovana ny tenin’i Jesosy farany — ny didiny farany — ho zava-dehibe indrindra ho antsika? 

Alao sary an-tsaina hoe inona no hitranga raha manolotra ny fiainantsika ho an’Andriamanitra isika mba hampahafantarana ny fangoraham-pony, ny heriny, ny fanatrehany, ny fahamarinana ary ny fitiavany? Inona no hitranga raha toa ka na aiza na aiza alehantsika, ny fifaneraserana rehetra ataontsika, dia niteny fotsiny isika hoe: “Andriamanitra ô, vonona tanteraka aho. Ampiasao aho, ampiasao ity fotoana ity, ampiasao ity fifaneraserana ity mba hisarihana ny hafa hanatona anao?” Hamaly an’io vavakao io ve izy raha araka ny fiheverinao? Eny, resy lahatra aho fa hanao izany izy. 

Izaho sy ianao no nofidin’Andriamanitra hampahafantatra azy eto amin’izao tontolo izao. Tsy misy plan B. Isika no planin’Andriamanitra A. Andeha isika hanao ny didiny farany ho laharam-pahamehana lehibe indrindra.

VAVAKA

Andriamanitra ô, na aiza na aiza alehako anio dia vonona tanteraka aho. Ampiasao aho amin'ny fifaneraserana rehetra, isaky ny fihaonana, hitarihana ny hafa ho aminao. Vonona mandrakariva ny handeha hanao mpianatra aho, amin'ny anaran'i Jesosy no ivavahako, amen.

Nalaina avy amin'ny 20/20: Hita.Nofidiana.Voairaka nosoratan'i Christine Caine. Copyright © 2019 by Christine Caine. Navoaka ary nahazoana alalana avy amin'ny Lifeway Women. All rights reserved.