HITAN'ANDRIAMANITRA IANAO

Fa hoy Jehovah tamin'i Samoela: Aza mijery ny tarehiny na ny hahavon'ny tsanganany, fa efa nolaviko izy; fa tsy mba toy ny fijerin'ny olona no fijerin'i Jehovah; fa ny olona mijery ny miseho eo ivelany, fa Jehovah kosa mijery ny fo.” -1 Samoela 16:7

Nandritra ny dia iray, taona maro lasa izay, nandeha nisotro kafe aho teo ampiandrasan'ny fianakavianay ny sidina. Nialoha an'ireo tovovavy i Nick mba hampilamina azy ireo. Rehefa niverina teo amin'ny fidirana aho, nandalo avy teo amin'ny terminal aho ka handeha hankany amin'ny tetezana fiaramanidina, dia nijery ahy indray ny mpiasan'ny zotram-piaramanidina iray ary niteny hoe: "Tsy mahazo miditra ianao tompoko"

Gaga aho ka nanontany azy hoe inona no tiany holazaina. 

“Eny, raha manam-potoana handehanana hisotro kafe ianao, dia noho izany, tsy manam-potoana hiakatra amin'ny fiaramanidina ianao.” 

Taitra aho. Tsy mitombina izany. Fantatro fa mbola tsy tara ny fotoana hiaingana aho. ““Mbola mivoha ny varavarana madama a. Azafady, raiso ny pasipaoroko ary avelao aho hiakatra.”

Tsy nihetsika izy.

“Ramatoa a, ny vadiko sy ny zanako dia efa ao anatiny ao,” ho aho. “Ka mba avelao aho hiditra.”

Tsy nihisaka mihitsy izy 

Tena tsaroako fa nahatsiaro tena ho tsy afa-manoatra, zendana ary toa ny tsy misy dikany aho. Tsy nanao fitserana ho ahy mihitsy izy ary tsy nisy norarahiana na tafasara-toerana tamin'ny fianakaviako aza aho. Nijery ahy izy, kanefa tsy niraraha ahy.

Tafiakatra tao anaty fiaramanidina ihany aho tamin’ny farany, nefa tsy hadinoko mihitsy ny fihetseham-poko nateraky ny nataon’io vehivavy io.Ankehitriny anefa, tonga saina tokoa izaho ny tamin'ny fotoana rehetra nitondrako tahaka azy - mihoatra noho ny nitondrako tena tahaka an'i Jesoa- rehefa nijery, nefa tsy niraraha. Mora amintsika tokoa ny mijery an'ilay "serveur" mandroso sakafo antsika, ny mpikarakara hoho eny amin'ny "salon" na ny mpivarotra eny ami'ny magazay. Tsy efa mahazatra loatra ve rehefa isika variana mijery finday iny dia adino, tsy miraraha ilay olona manolotra kafe antsika? Efa impiry moa isika no tsy miraraha ny hafa?

Ny mijery dia tsy midika fa miraraha. Ilay vehivavy teo am-pidiran-tseranana dia nijery ahy, kanefa tsyniraraha ahy. Nibanjina ahy ny fijeriny, kanefa tsy tsapany ary tsy hitany ny toe-javatra niainako

Tian'Andriamanitra isika hijery ary hiraharaha! Tiana isika raha mahita ny olona hafa araka ny fijeriNy - indrindra moa ireo olona mifanerasera amintsika isanandro. 

VAVAKA

Rainay izay an-danitra, sokafy ny masom-panahiko afahako tena mahita ny hafa ka mba tsy ho olona tsy miraraha ny hafa aho. Ampio aho hahatonga ny olona manodidina ahy hahatsiaro ho hita, fantatra, re, mendri-kaja ary misy vidiny. Ampiasao ity fampianarana ity mba hanehoana ahy ny fomba ahafahako mitombo mba hahitako sy hirarahiko ny hafa kokoa noho ny teo aloha, mba hahitako azy ireo araka ny fijerinao. Amin'ny anaran'i Jesoa, amen.

Nalaina avy amin'ny 20/20: Hita.Nofidiana.Voahiraka nosoratan'i Christine Caine. Copyright © 2019 by Christine Caine. Navoaka ary nahazoana alalana avy amin'ny Lifeway Women. All rights reserved.