រស់នៅដោយព្រះវិញ្ញាណ៖ គ្រាស្មឹងស្មាធិ៍ជាមួយ លោកគ្រូ ចន ផែពើ (Jonh Piper)គំរូ

ព្រះវិញ្ញាណគឺជាសេចក្ដីរីករាយពេញព្រះហឫទ័យនៃព្រះ

ព្រះវិញ្ញាណបរិសុទ្ធគឺជាព្រះ។ ជាអង្គដែលគង់នៅរួមជាមួយនឹងយើង ដឹកនាំយើង ហើយបន្សុទ្ធយើង។ ព្រះវិញ្ញាណបរិសុទ្ធគឺពិតជាព្រះ។ ភស្ដុតាងយ៉ាងសាមញ្ញសម្រាប់ព្រះនាមដែលបានផ្ដល់ឱ្យជារឿយៗ និងជាយូរមកហើយ នោះគឺ "ព្រះវិញ្ញាណនៃព្រះ"។ ព្រះវិញ្ញាណ គឺជា "របស់ផងព្រះ" ហើយក៏មិនមែនដោយសារតែព្រះបានបង្កើតព្រះវិញ្ញាណ ប៉ុន្តែដោយសារតែ ព្រះវិញ្ញាណ មានចរិតលក្ខណៈនិងធម្មជាតិស្របដូចព្រះជាម្ចាស់ ហើយព្រះអង្គបានយាងមកយ៉ាងអស់កល្បជានិច្ចពីព្រះជាម្ចាស់ (មើល ១ កូរិនថូស ២៖១០-១២)។

ប្រសិនបើព្រះបុត្រានៃព្រះមានឋានៈស្មើគ្នាយ៉ាងអស់កល្បជានិច្ចជាមួយនឹងព្រះវរបិតា ដូចគម្ពីរ យ៉ូហាន ១៖១-៣ បានចែងយ៉ាងជាក់ ថាព្រះអង្គពិតជាយ៉ាងដូច្នោះមែន នោះព្រះវិញ្ញាណក៏មានឋានៈស្មើគ្នាយ៉ាងអស់កល្បជានិច្ច រួមនឹងព្រះបុត្រានិងព្រះវរបិតាដែរ។ ដោយយោងតាម គម្ពីររ៉ូម ៨៖៩-១១ នេះគឺដោយសារតែ ព្រះវិញ្ញាណនៃព្រះគ្រីស្ទ គឺតែមួយ ដូចគ្នាជាមួយនឹងព្រះវិញ្ញាណនៃព្រះជាម្ចាស់។ ប្រសិនបើការនេះមិនពិតយ៉ាងដូច្នេះទេ នោះយើងនឹងត្រូវធ្វើការនឹកស្រមៃពីពេលវេលា ដែលព្រះបុត្រាគ្មានព្រះវិញ្ញាណ ហើយព្រះវរបិតាគ្មានព្រះវិញ្ញាណនោះដូចគ្នា។ ប៉ុន្តែ ព្រះវិញ្ញាណបរិសុទ្ធ ពិតជាសំខាន់ចាំបាច់ណាស់ ចំពោះទំនាក់ទំនងរវាងព្រះវរបិតាហើយនិងព្រះរាជបុត្រា។ ដូចគ្នានឹងពាក្យពេចន៍របស់លោក ស៊ី ជី ម៉ូល (C.G. Moule) ដែលថ្លែងថា៖ ព្រះអង្គគឺជា "ហេតុបណ្ដាលឱ្យ ជាចំណងសម្ពន្ធមេត្រីភាព ជាយាន នៃទំនាក់ទំនងរួម ក្នុងដួងចិត្តសោមនស្សនិងក្ដីស្រឡាញ់ដ៏អស់កល្បជានិច្ច" (សៀវភៅ៖ ភាពជាបុគ្គលនិងកិច្ចការនៃព្រះវិញ្ញាណបរិសុទ្ធ ទំព័រទី ២៨)។

តាំងពីមុនពេលវេលារហូតដល់អស់កល្បជានិច្ច ក្នុងព្រះទ័យស្រឡាញ់របស់ព្រះបិតាមានចំពោះព្រះបុត្រា នោះមានព្រះវិញ្ញាណបរិសុទ្ធគង់នៅជារហូតមក ពេញដោយក្ដីស្រឡាញ់និងជាទីសោមនស្ស រវាងអង្គនៃព្រះទាំងទ្វេ។ ព្រះវិញ្ញាណគឺជាអង្គបរិសុទ្ធផ្ទាល់។ ហេតុដូច្នេះហើយ ក្នុងខណៈពេលដែលព្រះយេស៊ូវអធិស្ឋានសម្រាប់ក្រុមជំនុំ នៅក្នុង យ៉ូហាន ១៧៖២៦ នោះព្រះអង្គទូលសូមព្រះបិតា ដែលគ្មានអ្វីក្រៅពីព្រះវិញ្ញាណបរិសុទ្ធឡើយ នៅគ្រាដែលព្រះអង្គមានបន្ទូលថា៖ «ទូល​បង្គំ​បាន​សម្តែង​ឲ្យ​គេ​ស្គាល់​ព្រះ‌នាម​ព្រះ‌អង្គ ក៏​នឹង​សម្តែង​ឲ្យ​គេ​ស្គាល់​ច្បាស់​ថែម​ទៀត ដើម្បី​ឲ្យ​សេចក្តី​ស្រឡាញ់ ដែល​ព្រះ‌អង្គ​បាន​ស្រឡាញ់​ទូល​បង្គំ​បាន​នៅ​ក្នុង​គេ ហើយ​ទូល​បង្គំ​ក៏​នៅ​ក្នុង​គេ​ដែរ»។

សិរីរុងរឿងដ៏ខ្ពង់ខ្ពស់បំផុតនៃរាល់អស់សេចក្ដីពិត នោះគឺថាយើងនឹងរុករកឃើញនៅក្នុងគម្រោងអានរយៈពេល ៧ ថ្ងៃនេះ -- ដោយព្រោះថានៅពេលដែលព្រះវិញ្ញាណបរិសុទ្ធយាងមកគង់នៅក្នុងជីវិតរបស់យើង នោះព្រះអង្គយាងមកពុំមែនត្រឹមតែជាព្រះវិញ្ញាណនៃព្រះបុត្រា ឬជាព្រះវិញ្ញាណនៃព្រះបិតានោះទេ ប៉ុន្តែព្រះអង្គយាងមកជាព្រះវិញ្ញាណនៃក្ដីស្រឡាញ់គ្មានដែនកំណត់ រវាងព្រះបិតាហើយនិងព្រះបុត្រា ដើម្បីឱ្យយើងអាចស្រឡាញ់ព្រះបិតាជាមួយនឹងក្ដីស្រឡាញ់ដដែលរបស់ព្រះបុត្រា ហើយនិងស្រឡាញ់ដល់ព្រះបុត្រាជាមួយនឹងក្ដីស្រឡាញ់ដដែល របស់ព្រះបិតា។

ស្វែងយល់បន្ថែម៖ http://www.desiringgod.org/messages/the-holy-spirit-he-is-god