ទាញយកកម្មវិធីតាមស្វែងរកសន្តិភាពគំរូ
មានសន្តិភាពជាមួយនឹងខ្លួនឯង
ជារឿយៗការប្រយុទ្ធដ៏អស្ចារ្យសម្រាប់សន្តិភាព នោះគឺស្ថិតនៅខាងក្នុងជម្រៅចិត្ដនៃមនុស្សយើងម្នាក់ៗនោះឯង។ មានរឿងមួយដែលនិយាយពីជីតាម្នាក់ ដែលគាត់បានប្រាប់ទៅចៅរបស់គាត់ថា៖ «តាមានអារម្មណ៍ថា ដូចជាមានកញ្ជ្រោងពីរកំពុងតែប្រយុទ្ធគ្នានៅក្នុងដួងចិត្តរបស់តា។ កញ្ជ្រោងទីមួយ វាពេញទៅដោយចិត្តសងសឹក ឆេវឆាវ និងចេះប្រើតែទង្វើហឹង្សាប៉ុណ្ណោះ។ រីឯកញ្ជ្រោងមួយទៀត វាពេញទៅដោយក្ដីស្រឡាញ់ និងចិត្តមេត្តាករុណា»។ ចៅនោះក៏បានសួរទៅជីតារបស់គាត់ថា៖ «តើកញ្ជ្រោងមួយណា ដែលប្រយុទ្ធយកឈ្នះចិត្តរបស់លោកតានោះ?»។ ជីតាក៏ឆ្លើយតបថា៖ «គឺកញ្ជ្រោងណា ដែលតាបានឲ្យចំណីវាច្រើនជាងគេ»។
យើងជ្រើសរើសចំណី សម្រាប់ព្រលឹងរបស់យើង។ តើការគិតប្រភេទណាដែលអ្នកមានសម្រាប់ខ្លួនអ្នកផ្ទាល់? ជីវិតខាងឯគំនិតនិងការគិតរបស់យើង គឺយើងត្រូវជួបប្រទៈវាជារាល់ថ្ងៃ ហើយយើងត្រូវតែប្រុងប្រយ័ត្ន ពីរបៀបដែលយើងដោះស្រាយជាមួយនឹងទុក្ខព្រួយរបស់យើង។ អត្ថបទព្រះគម្ពីរបានលើកទឹកចិត្តយើងឲ្យស្វែងរកសន្តិភាពសម្រាប់ខ្លួនយើង ដោយផ្ទេរទុក្ខកង្វល់របស់យើង ទៅដល់ព្រះជាម្ចាស់ ហើយទុកឲ្យព្រះទ្រង់ការពារនូវដួងចិត្តនិងគំនិតរបស់យើង ទោះបើមានពេលខ្លះ យើងមិនយល់អ្វីទាំងអស់ ក៏ដោយចុះ។
តាមសុភាសិតអាហ្រ្វិកមួយចែងថា៖
«ស្បែករបស់ខ្លារខិន ពីក្រៅគឺវាមើលទៅ ខ្មៅល្អស្អាតណាស់ ប៉ុន្តែចិត្តរបស់វាមិនស្អាត នោះទេ»។ ~ សុភាសិត របស់ បាលូបា (Baluba)
មាន អត្ថបទជំរុញទឹកចិត្តនៅលើវេបសាយ Rhythms របស់អង្គការ Tearfund ដែលល្អសម្រាប់ពេលវេលា បើអ្នកអាន ដោយក្នុងនោះមានចោទសួរជាសំណួរ ថាតើអត្តសញ្ញាណរបស់អ្នក វាផ្សាភ្ជាប់ និងបង្ហាញឱ្យគេសម្គាល់ឃើញ តាមរយៈសម្លៀកបំពាក់ ដែលអ្នកមានពីក្រៅមែនដែរឬយ៉ាងណា។
សកម្មភាព:
ជាញឹកញាប់យើងតែងស្វែងរកអត្តសញ្ញាណរបស់យើង ទៅតាមទ្រព្យសម្បត្តិ និងសម្ភារៈរបស់យើង។ ចូរទៅហាងសម្លៀកបំពាក់ដែលអ្នកចូលចិត្ត ដោយមិនបាច់ទិញអ្វីទេ គ្រាន់តែដើរចុះ ដើរឡើង ទៅតាមជួរសម្លៀកបំពាក់ទាំងនោះ រួចហើយរកឱកាស គិតពិចារណាទៅលើតម្រូវការរបស់អ្នកទៅមើល។ ចូរថ្វាយពាក្យសរសើរតម្កើង ដោយព្រោះព្រះទ្រង់បានបំពាក់លើរូបអ្នកនូវរ៉ូបនៃសេចក្ដីសុចរិត។ ចូរទូលសូមព្រះអង្គ ឲ្យព្រះអង្គ បានបង្ហាញអង្គទ្រង់ នៅក្នុងស្ថានភាព និងគ្រា ដែលអ្នកគិតថាតម្លៃរបស់អ្នក ស្ថិតនៅលើតែសំបកក្រៅនោះ ទាំងធ្វើការនៅក្នុងដួងចិត្ដរបស់អ្នក ដោយឱ្យអ្នកចាកចេញពីហាងសម្លៀកបំពាក់ ដោយដៃទទេ ទាំងឱ្យអ្នកដឹងថា អ្នកបានទៅស្វែងរកអ្វីមួយ ដែលមានតែព្រះជាម្ចាស់មួយប៉ុណ្ណោះ ដែលអាចផ្ដល់មកក្នុងជីវិតរបស់អ្នកបាន។
អត្ថបទគម្ពីរ
អំពីគម្រោងអាននេះ
អង្គការ TearFund ស្វះស្វែងរកការដឹកនាំពីព្រះជាម្ចាស់ នៅក្នុងរបៀបនៃការក្លាយជាអ្នកបញ្ចេញសំឡេងនៃសន្តិភាពយ៉ាងសកម្ម ជាអ្នកនាំការផ្សះផ្សាដល់ទំនាក់ទំនង និងជាតំណស្អិតរមួតក្នុងចំណោមសហគមន៍នានា នៅជុំវិញពិភពលោក។ ការសិក្សារយៈពេល ៧ ថ្ងៃ មានភ្ជាប់ជាមួយសកម្មភាព សម្រាប់នាំការជាសះស្បើយដល់ទំនាក់ទំនងរបស់អ្នកផ្ទាល់ និងធ្វើការអធិស្ឋានសម្រាប់ពិភពលោក ដែលយើងកំពុងរស់នៅ ដោយប្រើប្រាស់ប្រាជ្ញាដ៏ហូរហៀរ ដកស្រង់ចេញពីសុភាសិតរបស់ប្រជាជននៅទ្វីបអាហ្រិ្វក ដើម្បីជួយឱ្យយើងអាចស្វែងរកឃើញព្រះហឫទ័យរបស់ព្រះ សម្រាប់សន្តិភាពដ៏ពិតប្រាកដ។
More
