ទាញយកកម្មវិធីច្រូតយកការអរព្រះគុណនិងការដឹងគុណក្នុងគ្រប់រដូវកាលនៃជីវិត!គំរូ
ចូលមកក្នុងព្រះវត្តមានព្រះដោយក្ដីអរព្រះគុណ!
«ចូលមក យើងនាំគ្នាច្រៀងថ្វាយព្រះយេហូវ៉ា ចូរយើងបន្លឺសំឡេងដោយអំណរដល់ព្រះ ដែលជាថ្មដានៃការសង្គ្រោះរបស់យើង! ចូរយើងនាំគ្នាចូលមកចំពោះព្រះវត្តមានព្រះអង្គដោយអរព្រះគុណ ចូរយើងបន្លឺសំឡេងថ្វាយព្រះអង្គ ដោយបទសរសើរ! ដ្បិតព្រះយេហូវ៉ា ជាព្រះដ៏ធំអស្ចារ្យ ហើយជាព្រះមហាក្សត្រដ៏ធំលើអស់ទាំងព្រះ»។ ទំនុកតម្កើង ៩៥៖១-៣
មានមនុស្សខ្លះគាត់ក្រោកឡើងទាំងមានស្នាមញញឹមជាប់នឹងមុខ ដោយគាត់ត្រៀមខ្លួនរួចរាល់ដើម្បីផ្ដើមថ្ងៃមួយថ្មី! តែមានអ្នកដទៃផ្សេងទៀត ដែលគាត់ប្រឹងគ្របបាំងដណ្ដប់ក្បាល ពេលឃើញថ្ងៃរះឡើងភ្លាម ទាំងគាត់ដកដង្ហើមធំៗ។ គំនិតរបស់គាត់ញញើត និងមិនចង់ប្រឈមនឹងថ្ងៃថ្មីនោះឡើយ។
មានរឿងអ្វីមួយ ខ្ញុំសង្ឃឹមថាយើងរាល់គ្នានឹងរៀនបានតាមរយៈគម្រោងអាននេះ នោះគឺថា រាល់គ្រប់វិនាទី ដែលយើងក្រោកឡើង នោះយើងមាននូវអភ័យឯកសិទ្ធិ និងឱកាសក្នុងការស្ថិតនៅក្នុងព្រះវត្តមាននៃព្រះជាម្ចាស់! តើឱ្យខ្ញុំអាចដឹងអំពីការនេះបានដោយរបៀបណា? នេះដោយសារតែអ្វីដែលបានកើតឡើង នៅឯ កាលវ៉ារី ។ ពីព្រោះវាំងននបានរហែកពីលើមកក្រោម នៅពេលដែលផែនដីរញ្ជួយ ទាំងអនុញ្ញាតឱ្យយើងរាល់គ្នាអាចចូលទៅចំពោះបល្ល័ង្ក ដោយភាពអង់អាចក្លាហានបាន។ ការសុគតរបស់ព្រះយេស៊ូវនៅលើឈើឆ្កាង បានប្រទានដល់យើងនូវសិទ្ធិ ដែលអាចឱ្យយើងចូលទៅក្នុងព្រះវត្តមាននៃព្រះ! យើងលែងត្រូវការបូជាចារ្យ ដើម្បីឱ្យយើងអាចចូលទៅចំពោះព្រះវត្តមានព្រះទៀតហើយ។ អ្នកហើយនិងខ្ញុំមានសេរីភាពនៅក្នុងការចូលទៅក្នុងព្រះវត្តមាននោះ!
នៅរំពេចពេលដែលយើងក្រោកឡើង នៅពេលព្រឹកម្ដងៗ នៅគ្រាដែលយើងសម្លឹងមើលឃើញពន្លឺរបស់ព្រះ ចែងចាំងចំកញ្ចក់បង្អួចបន្ទប់របស់យើង នៅពេលដែលយើងមើលឃើញពីផ្ទៃមេឃ ឬឮពីសត្វបក្សីច្រៀងត្រកង នោះយើងកំពុងតែស្ថិតនៅក្នុងព្រះវត្តមានមួយបែបដែរ ដ្បិតព្រះអង្គបានបង្កើតរាល់គ្រប់របស់សព្វសារពើ។ តើយើងនឹងទៅជំរាបសួរ និងស្វាគមន៍ព្រះ ដោយរបៀបណា? អត្ថបទគម្ពីរប្រាប់ដល់យើង ឱ្យយើងច្រៀង ឱ្យយើងបន្លឺសំឡេងនៃអំណរ ហើយចូលមកក្នុងព្រះវត្តមាននៃព្រះ ដោយអ្វីដែរ? គឺដោយការអរព្រះគុណ!
លំហាត់នៅថ្ងៃនេះ៖
- ប្រសិនបើអ្នកមានទម្លាប់មួម៉ៅនាពេលព្រឹកព្រលឹម សូមក្ដិចត្រួយនោះចេញទៅ!
- ចូរហាត់បញ្ចេញស្នាមញញឹម មុននឹងអ្នកទទួលទានកាហ្វេ ឬតែ នាពេលព្រឹក។
- ចូរទៅជំរាបសួរ និងទទួលស្វាគមន៍មនុស្សជាទីស្រឡាញ់របស់អ្នក ដោយភាពត្រេកអរ និងព្យាយាមអរគុណពួកគេ សម្រាប់ការអ្វីមួយ។
- ចូរបន្លឺសំឡេងនៃអំណរនៅពេលដែលអ្នកកំពុងតែធ្វើដំណើរទៅធ្វើការ ឬទៅផ្សារទិញអីវ៉ាន់។
អត្ថបទគម្ពីរ
អំពីគម្រោងអាននេះ
ខ្ញុំពិតជាស្ញប់ស្ញែងចំពោះមេរៀនដែលយើងអាចរៀនបានពីសង្គមវប្បធម៌ដទៃផ្សេងទៀត! នៅក្នុងសង្គមវប្បធម៌ខ្លះ គេដូចជាមិនសូវពឹង ឬមានឧបករណ៍សម្ភារៈអីច្រើនទេ តែទោះជាយ៉ាងណាមិញ ពួកគេស្ដែងបង្ហាញចេញនូវអារម្មណ៍យ៉ាងជ្រាលជ្រៅ ក្នុងការដឹងគុណ ហើយមានពេញដោយអំណរ! ខ្ញុំមិនដឹងថាអ្នកមានអារម្មណ៍យ៉ាងណានោះទេ ប៉ុន្តែខ្ញុំពិតជាចង់បានចិត្ត ដែលប្រកបដោយការដឹងគុណ ហើយនិងអំណរ ដើម្បីឱ្យការនោះបានក្លាយទៅជាផ្នែកមួយនៃជីវិតរបស់ខ្ញុំ ដែលវាប្រៀបបានទៅនឹងការដកដង្ហើមចេញចូលរបស់ខ្ញុំដែរ! នៅក្នុងគម្រោងអាននេះ យើងនឹងស្វែងរុករកឃើញពីរបៀប ដែលយើងអាចទទួលយកគ្រាទាំងឡាយនៃជីវិតមកអនុវត្ត ដើម្បីឱ្យចិត្តយើងបាននៅបន្តចេះដឹងគុណ ក្នុងជីវិតរស់នៅជាប្រចាំថ្ងៃរបស់យើង។
More
