ទាញយកកម្មវិធីចក្ខុ ២០/២០៖ បានឃើញ បានជ្រើសរើស បានចាត់ឱ្យទៅ។ ដោយអ្នកស្រី គ្រីស្ទីន ខេន (Christine Caine) គំរូ
ព្រះបានជ្រើសរើសអ្នក
«សូមសរសើរដល់ព្រះ ជាព្រះវរបិតារបស់ព្រះយេស៊ូវគ្រីស្ទ ជាព្រះអម្ចាស់នៃយើង ដែលទ្រង់បានប្រទានពរមកយើងក្នុងព្រះគ្រីស្ទ ដោយគ្រប់ទាំងព្រះពរខាងវិញ្ញាណនៅស្ថានសួគ៌។ តាមដែលព្រះអង្គបានជ្រើសរើសយើងក្នុងព្រះគ្រីស្ទ តាំងពីមុនកំណើតពិភពលោកមកម៉្លេះ ដើម្បីឲ្យយើងបានបរិសុទ្ធ ហើយឥតកន្លែងបន្ទោសបាននៅចំពោះព្រះអង្គ ដោយសេចក្តីស្រឡាញ់។ ព្រះអង្គបានតម្រូវយើងទុកជាមុន សម្រាប់ឲ្យទ្រង់បានទទួលយើងជាកូន តាមរយៈព្រះយេស៊ូវគ្រីស្ទ ស្របតាមបំណងដែលព្រះអង្គសព្វព្រះហឫទ័យ ដើម្បីសរសើរដល់សិរីល្អនៃព្រះគុណរបស់ព្រះអង្គ ដែលបានប្រទានមកយើងដោយឥតគិតថ្លៃ ក្នុងព្រះរាជបុត្រាស្ងួនភ្ងារបស់ព្រះអង្គ»។ -អេភេសូរ ១៖៣-៦ គកស១៦
«គ្រីស្ទីន?» ម្ដាយខ្ញុំគាត់សួរ៖ «ដោយសារតែយើងត្រូវប្រាប់ពីការពិត តើកូនចង់ដឹងពីរឿងពិតទាំងស្រុងដែរឬទេ?»
ខ្ញុំមានអាយុ ៣៣ ឆ្នាំ ហើយកាលគ្រានោះ ខ្ញុំដឹងពីរបៀបដែលម្ដាយរបស់ខ្ញុំគាត់ចូលចិត្តសួរ។ បើគាត់សួរយ៉ាងដូច្នោះហើយ នោះគឺវាមានន័យតែមួយប៉ុណ្ណោះ។
ខ្ញុំបានប្រឹងរត់ទៅផ្ទះរបស់គាត់ ដើម្បីធ្វើអន្តរាគមន៍ ដោយព្រោះខ្ញុំសង្ស័យថារឿងដែលខ្ញុំធ្លាប់គិត នោះវាមិនអាចក្លាយទៅជារឿងពិតបានទេ។ បងប្រុសរបស់ខ្ញុំ ចូច (George) បានទទួលសំបុត្រមួយ ដោយប្រាប់ថា គាត់គឺជាកូន ដែលគ្រួសាររបស់ខ្ញុំបានយកមកចិញ្ចឹម។ ខ្ញុំទើបទៅដល់មាត់ទ្វារ នៅពេលដែល ចូច កំពុងតែហុចលិខិតមួយនោះ ឱ្យទៅម្ដាយរបស់ខ្ញុំ។
ខ្ញុំមិនអាចបំភ្លេចរូបភាពនេះបានទេ ព្រោះពេលនោះ ដៃម្ដាយរបស់ខ្ញុំ គាត់នៅញាប់ញ័រ។ ក្ដីភ័យខ្លាចដែលមានពេញក្នុងកែវភ្នែករបស់គាត់។ គាត់និយាយលែងចេញ។ ហើយមានទាំងទឹកភ្នែកផង វាបានស្រក់ហូរចេញមកនៅលើថ្ពាល់របស់យើងទាំងអស់គ្នា។
នៅពេលគាត់អាចនិយាយបានឡើងវិញ នោះខ្ញុំបានឮសំឡេង ពោរពេញដោយការគ្រាំចិត្ត។ «ឱ្យម៉ាក់សុំទោសកូនផង ដែលកូនត្រូវដឹងពីដំណឹងនេះ តាមរយៈលិខិតមួយច្បាប់។ យើងមិនដែលគិតចង់ឱ្យកូនឈឺចាប់នោះទេ។ ប៉ាកូន ស្រឡាញ់កូន។ ម៉ាក់ក៏ស្រឡាញ់កូន។ បើកូនមិនមែនជាកូនបង្កើត ក៏ម៉ាក់ស្រឡាញ់កូន ដូចកូនជាកូនបង្កើតរបស់ម៉ាក់ អញ្ចឹងដែរ»។
ខ្ញុំចាំថាខ្ញុំបានដើរទៅចង្រ្កានបាយ ទាំងរៀបចំចំណីអាហារដាក់នៅលើតុ ដោយព្រោះថា តាមទម្លាប់គ្រួសារបែបជនជាតិក្រិក នៅពេលដែលមានវិបត្តិត្រូវដោះស្រាយ៖ នោះគឺយើងត្រូវតែមានអីញ៉ាំ។
នៅពេលដែលខ្ញុំឈោងទៅយកនំស្រួយ បាក្លាវ៉ា (baklava) នោះម៉ាក់ខ្ញុំគាត់សួរខ្ញុំ ពីរាល់សំណួរប្រៀបដូចជាប្រាប់ ដែលការសួរនាំទាំងនោះ វាស្ទើរទៅនឹងអ្វីដែលខ្ញុំដឹងខាងក្នុងចិត្ត។ ពិតមែន... ខ្ញុំដូចជាដឹង។ ខ្ញុំស្វះស្វែងរកចម្លើយបញ្ជាក់ នៅក្នុងកែវភ្នែករបស់គាត់ ទាំងគិតនិងប្រាថ្នាថាអ្វីដែលខ្ញុំធ្លាប់គិត នោះមិនមែនជារឿងពិតទេ។ ហើយខ្ញុំក៏លើកឡើងពីសំណួរមួយទៅកាន់រូបគាត់៖ «តើកូន ជាកូនចិញ្ចឹមម្នាក់ដែរ មែនឬទេ?»។
ប៉ុន្មាននាទីក្រោយមក គាត់បាននិយាយពាក្យពេចន៍ដ៏មានតម្លៃមកកាន់ខ្ញុំ។ ពាក្យសម្ដីនោះ គឺជាភាសាដែលនាំមកនូវការព្យាបាលដ៏សម្បើមមកដល់ខ្ញុំ។ គាត់ថែមទាំងបញ្ជាក់និងនិយាយវាសាជាថ្មី នៅសប្ដាហ៍ជាបន្តបន្ទាប់ដែរ…
«ម៉ាក់បានស្រឡាញ់កូន មុននឹងម៉ាក់បានស្គាល់កូនទៅទៀត»។
រហូតមកដល់ឥឡូវនេះ ខ្ញុំនៅតែចងចាំទាំងឱបក្រសោបចំពោះពាក្យពេចន៍ទាំងនេះ។ ពាក្យសម្ដីទាំងនោះ គឺជាទឹកចិត្តរបស់អ្នកម្ដាយ ដែលគាត់បានអនុញ្ញាតឱ្យខ្ញុំដឹង ថាគាត់មានបំណងប៉ងចង់បានខ្ញុំ។ គាត់រំពឹងថាបានរូបខ្ញុំ។ ហើយគាត់បានជ្រើសរើសរូបខ្ញុំ មុននឹងរូបគាត់ដាក់កែវភ្នែកសម្លឹងមករករូបខ្ញុំទៅទៀត។
នៅពេលខ្ញុំគិតអំពីពាក្យពេចន៍ទាំងនោះ ខ្ញុំពិតជាទទួលបាននូវភាពកក់ក្ដៅខ្លាំងណាស់ ដោយព្រោះថា ខ្ញុំប្រៀបដូចជាបានឮពីព្រះទ័យនៃព្រះវរបិតា ដែលជាព្រះមានព្រះទ័យតែងតែចង់បានរូបខ្ញុំអញ្ចឹងដែរ។ ព្រះអង្គគឺជាព្រះដែលបានជ្រើសរើសខ្ញុំ តាំងពីមុនម្ដាយរបស់ខ្ញុំបានជ្រើសរើសរូបខ្ញុំទៅទៀត។
ហើយព្រះអង្គក៏ជាព្រះដែលបានជ្រើសរើសរូបអ្នកផងដែរ។
សេចក្ដីអធិស្ឋាន
ឱ ព្រះអម្ចាស់អើយ សូមអរព្រះគុណ ដែលព្រះអង្គបានជ្រើសរើសទូលបង្គំ ក្នុងនាមជាបុត្រីរបស់ព្រះអង្គ និងជាម្នាក់ដែលនាំដំណឹងល្អពីព្រះបុត្រារបស់ទ្រង់ទៅដល់ពិភពលោក។ ទូលបង្គំអធិស្ឋានសូមព្រះអង្គប្រទានកម្លាំង និងចិត្តក្លាហាន ឱ្យទូលបង្គំមិនត្រឹមតែមើលឃើញពីអ្នកដទៃ ដូចដែលព្រះអង្គបានទតមើលឃើញពីពួកគេប៉ុណ្ណោះនោះទេ ប៉ុន្តែ ចូរឱ្យទូលបង្គំហ៊ានបោះជំហាននៅក្នុងសេចក្ដីជំនឿ ទាំងទៅប៉ះពាល់ដល់ពួកគេ ជាមួយនឹងក្ដីស្រឡាញ់របស់ព្រះអង្គផងដែរ។ សូមឱ្យទូលបង្គំអាចជួយដល់ពួកគេ ដើម្បីឱ្យពួកគេបានដឹងថាពួកគេគឺជាបុត្រធីតាដែលព្រះអង្គបានជ្រើសរើស។ អាមែន។
ដកស្រង់ពី ចក្ខុ ២០/២០៖ បានឃើញ បានជ្រើសរើស បានចាត់ឱ្យទៅ ដោយអ្នកស្រី គ្រីស្ទីន ខេន (Christine Caine)។ រក្សាសិទ្ធិ © 2019 ដោយគ្រីស្ទីន ខេន។ បោះពុម្ពសាជាថ្មី ដោយមានការអនុញ្ញាតពី ព័ន្ធកិច្ច ផ្លូវជីវិតស្រ្តី (Lifeway Women)។ រក្សាសិទ្ធិគ្រប់យ៉ាង។
អំពីគម្រោងអាននេះ
តើអ្នកអាចនឹកស្រមៃពីអារម្មណ៍ ដោយព្រោះអ្នកដឹងថាព្រះបានសម្លឹងមើលឃើញពីរូបអ្នក ទាំងផ្ដល់តម្លៃដល់អ្នក ដូច្នេះហើយ អ្នកមិនអាចនៅស្ងៀមបានទេ អ្នកត្រូវតែមានដួងចិត្តហ៊ានសម្លឹងមើលពីអ្នកដទៃ ទាំងឱ្យគេបានដឹងពីតម្លៃរបស់គេ តើអ្នកអាចស្រមៃឃើញយ៉ាងដូច្នេះបានដែរឬទេ? តើអ្នកអាចនឹកស្រមៃថាជារៀងរាល់ថ្ងៃ ទោះជាអ្នករស់នៅក្នុងជីវិតសាមញ្ញ នោះអ្នកនៅតែអាចជះឥទ្ធិពលដ៏នៅអស់កល្បជានិច្ច បានដែរឬទេ? គម្រោងអានរយៈពេល ៧ ថ្ងៃ ដោយ គ្រីស្ទីន ខេន (Christine Caine) នឹងជួយដល់អ្នក ឱ្យស្វែងរកឃើញ ពីរបៀបដែលព្រះជាម្ចាស់បានទតឃើញពីរូបអ្នក បានជ្រើសរើសរូបអ្នក និងបានចាត់ឱ្យអ្នកទៅឃើញពីមនុស្សដទៃ និងជួយឱ្យពួកគេបានដឹងពីទំហំនៃតម្លៃរបស់ពួកគេ តាមដែលព្រះទតមើលឃើញពីពួកគេ—ជាមួយនឹងចក្ខុវិស័យ ឬដូចកម្រិតកែវភ្នែក មើលឃើញច្បាស់ ២០/២០ អញ្ចឹងនោះដែរ។
More
