Rhoi iddo e dy BryderSampl

Caredigrwydd Bach

”felly dangoswch chithau dosturi at bobl eraill, a bod yn garedig, yn ostyngedig, yn addfwyn ac yn amyneddgar.” -Colosiaid 3:12

Mae Amanda yn gweithio fel nyrs gymunedol ac yn rhannu ei hamser ymhlith sawl cartref nyrsio - yn aml yn dod â'i merch Ruby, un ar ddeg oed, i'r gwaith. Am rywbeth i'w wneud, dechreuodd Ruby ofyn i drigolion, “Pe gallech chi gael unrhyw dri pheth, beth fyddech chi ei eisiau?” a chofnodi eu hatebion yn ei llyfr nodiadau. Yn syndod, roedd llawer o'u dymuniadau am bethau bach - selsig Fienna, pastai siocled, caws, afocados. Felly sefydlodd Ruby GoFundMe i'w helpu i ddarparu ar gyfer eu dymuniadau syml. A phan fydd hi'n dosbarthu'r nwyddau, mae hi'n rhoi cwtsh i bawb. Mae hi'n dweud, “Mae'n codi dy galon di. Mae wir yn gwneud hynny.”

Pan dŷn ni’n dangos tosturi a charedigrwydd fel Ruby, dŷn ni’n adlewyrchu ein Duw sy’n “ garedig a thrugarog; mor amyneddgar ac anhygoel o hael!” (Salm 145:8). Dyna pam yr anogodd yr apostol Paul ni, fel pobl Dduw, i ddangos “tosturi at bobl eraill, a bod yn garedig, yn ostyngedig, yn addfwyn ac yn amyneddgar.” (Colosiaid 3:12). Gan fod Duw wedi dangos tosturi mawr tuag atom, dŷn ni’n naturiol yn hiraethu am rannu ei dosturi ag eraill. Ac wrth i ni wneud hynny’n fwriadol, dŷn ni’n “gwisgo” ein hunain ynddo.

Mae Paul yn mynd ymlaen i ddweud wrthym: “gwisgwch gariad dros y cwbl i gyd – mae cariad yn clymu’r cwbl yn berffaith gyda’i gilydd.” (adn. 14). Ac mae’n ein hatgoffa ein bod ni i “wneud bopeth gan gofio eich bod yn cynrychioli yr Arglwydd Iesu Grist” (adn. 17), a chofio bod pob peth da yn dod oddi wrth Dduw. Pan fyddwn ni'n garedig ag eraill, mae ein hysbryd yn codi.

Alyson Kieda

Iesu, diolch i ti am ddangos caredigrwydd diderfyn, gorlawn inni. Helpa ni i gael llawenydd wrth wneud gweithredoedd caredig dros eraill.