Спатканьні ў сучаснасьціУзор

Прынцыпы сустрэчаў (частка 2)

Учора мы спыніліся на прынцыпе аўтаноміі ў сустрэчах - сустрэчы толькі з іншым вернікам у Хрыста. Калі вы трымаецеся гэтага прынцыпа, то абое будзеце дзейнічаць паводле аднолькавых "правілаў" у тым, што тычыцца вашага шляху з Богам. Гэта вядзе да наступнага прынцыпа: сэксуальнай чысьціні.

У сучаснасьці прынцып сэксуальнай чысьціні быў страчаны. Але ён важны, бо сэкс - гэта нешта значна большае, чым просты фізічны кантакт. У момант сэксуальных адносінаў адбываецца таксама значна глыбейшая, эмацыйная сувязь. Вашым найлепшым сябрам мусіць быць ваш сужонак, але калі сэксуальныя адносіны пачынаюцца зарана, гэта скажае вашу здольнасьць ацэньваць, ці будзе гэты чалавек добрым сябрам. Праз гэта вы можаце даўжэй заставацца ў тых адносінах, якія вам не патрэбныя, а спыненьне такіх адносінаў бывае значна больш балючым.

З гэтага вынікае наступны прынцып: стаўцеся да чалавека, з якім вы сустракаецеся, як да дзіця Божага. Тое, кім вы ёсьць, уплывае на тое, што вы робіце. Таму, калі вы на спатканьні, вам трэба бачыць таго, хто побач, як дзіця Бога (гэта справядліва і для другога боку). Як абыходзіцца з дзіцём Цара нябёсаў? Ветліва, з павагай, пашанай і дабрынёй. Агульным вынікам вашай прысутнасьці ў любых адносінах мусіць стаць паляпшэньне чалавека. Імкніцеся натхняць іншых на большы давер і любоў да Бога праз вашу прысутнасьць у іх жыцьці.

Ваша мэта - дабраславіць іншых, а не проста ўразіць іх. Таму абедайце, знаёмцеся, рабіце тое, што вам падабаецца. Вы не спрабуеце заваяваць таго, з кім сустракаецеся, але проста ацэньваеце, наколькі вы падыходзіце адно адному. Уважліва слухайце, задавайце прадуманыя пытаньні, шчыра дзяліцеся сваімі думкамі. Рабіце кампліменты. Падбадзёрвайце. І шчыра і прыязна выказвайце сваю думку. Не пераймайцеся тым, каб уразіць. Сустрэчы існуюць для ацэнкі і дабраславеньня. Вось і ўсё.

Падыходзім да наступнага: дазвольце людзям, якім вы давяраеце, удзельнічаць у вашых размовах. Рамантычныя пачуцьці маюць тэндэнцыю ап'яняць і скажаць, таму падказкі мудрых людзей могуць засьцерагчы вас ад таго, каб занадта доўга быць побач не з тым чалавекам. Абірайце сяброў, якія любяць Бога, любяць вас і не баяцца сказаць дакладна тое, што думаюць. Прасіце іх выказвацца ад самага пачатку і часта.

Апошні прынцып сустрэчаў - быць цярплівым. Хай адносіны разьвіваюцца ў сваім тэмпе. Не сьпяшайцеся па пярсьцёнак, але чакайце і назірайце, які характар мае той, з кім вы сустракаецеся. Некаторыя людзі могуць падацца непадыходзячымі ўжо на пачатку сустрэчаў. Іншыя могуць добра выглядаць на першым этапе, але з цягам часу вы пачнеце сумнявацца ў нейкіх рысах іх характару. Назірайце ўважліва, асабліва за іх рэакцыяй, калі нешта пойдзе не так, як яны задумалі. Дайце сабе магчымасьць пабачыць іх у розных сітуацыях - спрыяльных і не вельмі.

Ці знойдзеце вы вельмі адпаведнага вам чалавека? Я не ведаю. Але я ведаю, што Бог даў вам мудрасьці і Самога Сябе, як падтрымку на працягу жыцьця. Я малюся аб тым, каб вашыя спадзяваньні ў часе сустрэчаў былі засяроджаныя на Цары, а не на прынцы або прынцэсе. Я малюся аб тым, каб вы ішлі за Ім, верылі, што Ён падбае пра вашы патрэбы і - калі на тое будзе Яго воля - прывядзе вас да патрэбнага чалавека ў правільны час.

Адкажыце

Чаму сэксуальная чысьціня важная падчас сустрэчаў? Як устрыманьне ад сэкса да шлюба дапаможа вам збудаваць трывалыя адносіны пасьля вясельля?

Што кажа пра ваш характар ваша стаўленьне да чалавека, з якім сустракаецеся? Чаму важна ставіцца да іншага, як да ўлюбёнага дзіцяці Божага?

Хто можа казаць праўду адносна вашага жыцьця ў перыяд сустрэчаў? Наколькі вы адкрытыя да словаў гэтага чалавека?

Калі для вас было складана заставацца цярплівым у адносінах? Што можна даведацца пра чалавека толькі праз нейкі час?