Спатканьні ў сучаснасьціУзор

Лоцман у падарожжы
Гледзячы на жыцьцё і каханьне многіх сучасьнікаў, я бачу страх. Страх памыліцца. Страх прамахнуцца. Страх прапусьціць магчымасьці. У іншых я бачу ганарлівасьць - настойлівае жаданьне жыць на сваіх умовах, каб ніхто не пагражаў іх свабодзе слова. У многіх я таксама бачу пажадлівасьць. Навошта эмацыйны бок адносінаў, калі можна скарыстацца адно фізічным асьпектам? Страх, ганарлівасьць і пажадлівасьць ёсьць каранямі многіх праблем, якія прарастаюць у адносінах.
Нішто з гэтага не скіраванае на каханьне. Страх закрываецца і аддаляецца, а каханьне адкрываецца і шчодра дае. Ганарлівасьць не стрывае шчырасьці перад іншым, а каханьне рызыкуе ўразьлівасьцю дзеля іншага чалавека. Пажадлівасьць кажа іншаму, што ёй патрэбныя толькі тыя часткі, якімі яна можа скарыстацца, але каханьне прымае ўсяго чалавека - у лепшыя і горшыя яго дні.
Пакуль вашымі адносінамі кіруюць страх, пажадлівасьць і ганарлівасьць, вы будзеце аддаляцца ад здаровага каханьня. Гэтыя рэчы давядуць вас да самоты або створаць неглыбокія адносіны, якія не шануюць Бога. Гэта часта сустракаецца ў сучаснай культуры. Я бачу пакаленьне, якое згубілася, не ведае, як пераадолець бурнае мора каханьня і пазьбегнуць глыбіняў страху, ганарлівасьці і пажадлівасьці. Яны дрэйфуюць у ім, і іх б'е вятрамі і хвалямі.
Раней, калі карабель трапляў у небясьпечныя воды, капітан мусіў прызнаць, што яму не хапала ведаў для таго, каб спакойна ўвесьці судна ў порт. Калі гэта адбывалася (а тое было яшчэ да зьяўленьня сучасных відаў сувязі), ён падымаў сьцяг з сігналам "Мне патрэбны лоцман". Лоцман, знаёмы з мясцовымі водамі, бачыў сьцяг, сядаў у лодку, веславаў на карабель і падымаўся туды.
Лоцман браў на сябе кіраваньне караблём і бясьпечна праводзіў яго праз скалы і мялізны ў порт. Для іншых лоцманаў, якія маглі захацець падняцца на борт, падымаўся яшчэ адзін сьцяг - чырвона-белы. Так ім абвяшчалі, што лоцман ужо знайшоўся. Іншыя былі непатрэбныя, і мясцовыя жыхары ведалі, што карабель у надзейных руках.
У няпэўнасьці вашых спатканьняў вы таксама маеце спосаб пракласьці курс. Вы можаце прызнаць сваю паразу і тое, што вам "патрэбны лоцман", які адвядзе вас ад нябачнай небясьпекі. І вы можаце ўзьняць сьцяг, які скажа сьвету: "Я маю лоцмана", і ісьці толькі за ім.
Бог - ваш Творца, і толькі Ён можа прывесьці вас дадому. У Бібліі сказана, што Ён ёсьць любоўю (гл. 1 Яна 4:8). Таму прызнайце, што ў сферы спатканьняў вы таксама патрабуеце таго, хто правядзе вас праз нязьведаныя воды каханьня. Абвясьціце Богу, што вам патрэбна, каб Ён стаў за штурвал і вёў вас. Ваша падарожжа ў спатканьні павінна распачацца менавіта з гэтага.
Адкажыце
Якую ролю страх, ганарлівасьць і пажадлівасьць адыгралі ў вашых пошуках рамантычнага каханьня? Як вы перажывалі здаровае каханьне?
Праз якія "небясьпечныя воды" вы праходзілі ў сферы спатканьняў?
Што для вас значыць прызнаць сваю бездапаможнасьць і сваю патрэбу ў лоцмане ў сферы спатканьняў