Спатканьні ў сучаснасьціУзор

З кім сустракацца

Адной з найбольшых небясьпек у сустрэчах ёсьць тэндэнцыя да спажывецкага, а не спадарожніцкага менталітэту. Калі запытацца ў людзей, з кім бы яны хацелі сустракацца, то яны пачнуць пералічваць розныя характарыстыкі. "Высокі, але не занадта. Чульлівы, але моцны. Упэўнены, але таксама клапатлівы. Прыгожы, але вясёлы. І каб меў добрую працу з добрым заробкам”.

Праблема з гэтым сьпісам характарыстык палягае ў тым, што ён стварае чаканьні, якім ніхто не можа адпавядаць. Вы спрабуеце падагнаць сваю замову пад тое, што лічыце для сябе найлепшым. Але ў сустрэчах вы шукаеце асобу, якую будзеце кахаць, а не тавар для спажываньня. Таму нельга выбіраць паводле зьменлівых характарыстык - зьнешнасьць, шарм або заможнасьць, бо гэтыя рэчы праходзяць (гл.Прыповесьці 31:30). Калі ваш шлюб збудаваны на паверхневых характарыстыках, то вы не маеце надзеі на трывалую будучыню.

Сустракаючыся, вы не зьбіраеце з частак чалавека робата, які будзе адпавядаць вашым патрэбам. Хутчэй, вы аптымізуеце сваё жыцьцё, каб збудаваць іншага чалавека для славы Божай. Чалавек, з якім вы возьмеце шлюб, праз гэта будзе мець апорную кропку любові і маралі па-за тым, што прапануеце асабіста вы, так што ваш шлюб застанецца моцным, нават калі ў вас будуць моманты слабасьці. Вам патрэбны той, вернасьць каго вам не караніцца ў ненадзейных пясках абставінаў.

Дык што, вы зьбіраецеся даведацца ўсё гэта пра чалавека на першым спатканьні? Вядома ж, не! Хто заўгодна можа вытрымаць інтэрвію на гадзіну. Але вы хочаце ўбачыць таго, хто намагаецца рабіць цудоўныя справы з цудоўных прычынаў. Вам патрэбны той, хто актыўна шукае Госпада, чыя адданасьць Яму параўнальная з вашай. Вы ж хацелі б абяцаць адзін аднаму вернасьць ля алтара, не сумняваючыся ва ўзаемнай шчырасьці.

Вы захочаце пражыць жыцьцё з тым, хто не проста верны Богу, але і добра падыходзіць вам. Вашы асабістыя перакананьні і вера ў Бога важныя ў вашых адносінах. Ёсьць крытычна важныя багаслоўскія пытаньні, адносна якіх немагчыма ісьці на саступкі: існаваньне Трыадзінага Бога, рэальнасьць грэха, сьмерць Хрыста замест нас, збаўленьне ласкай праз веру. Апроч гэтых ёсьць і іншыя важныя пытаньні, па якіх вы можаце не пагаджацца, але зможаце працаваць над гэтым разам. І я перасьцерагаю вас: хаця няма патрэбы крочыць у нагу па кожным пытаньні, але па найважнейшых згода неабходная.

Важная і сацыяльная сумяшчальнасьць. Большую частку вашага сямейнага жыцьця будзе займаць не сэкс, але стасункі з іншымі людзьмі. Ваш спадарожнік мусіць быць цікавым для вас. Вашы жыцьцёвыя і кар'ерныя мэты мусяць быць сумяшчальнымі. Істотным будзе і некаторы кампраміс. Але калі яго зашмат, то вы абодва рызыкуеце расчаравацца, бо не зможаце выканаць сваю жыцьцёвую місію.

У Бібліі прызнаецца каштоўнасьць фізічнай прывабнасьці (пачытайце Песьню Саламонаву). Гэта чыньнік збудаваньня адносінаў, але ён не вызначае, што вы павінны быць з кімсьці. Відавочна, гэта праз тое, што ўсе мы старэем і наша зьнешняя прыгажосьць вяне. Таму будзьце разумнымі! Нашмат прасьцей разгледзець гэтыя пытаньні да вясельля. Разважаньне над гэтым дапаможа вам вызначыць, ці падрыхтаваў Бог для вас адносіны.

Адкажыце

Калі вы вырашаеце, з кім сустракацца, чаго вы шукаеце ў чалавеку?

Што для вас будзе вырашальным у вызначэньні таго, з кім сустракацца? На якія саступкі і ахвяры ў адносінах вы гатовыя пайсьці?

Як вы вызначаеце, ці імкнецца чалавек, з якім вы хочаце сустракацца, да тых самых мэтаў, што і вы? У чым патэнцыйная небясьпека ў ненаданьні дастатковай увагі гэтаму пытаньню?