Спатканьні ў сучаснасьціУзор

Як сустракацца

Некалькі год таму, наведваючы Вялікі Каньён, я спусьціўся даволі глыбока, каб пабачыць вадаспад. Ідучы ўздоўж ракі Каларада, я сустрэў маладую пару, якая кіравалася да таго ж вадаспаду. Яны запрасілі мяне далучыцца да іх, але мне падалося, што яны запаволяць маё падарожжа. Рухаючыся далей, я пачаў баяцца, што ўжо прапусьціў вадаспад. У паніцы я пачаў караскацца на скалу і напалохаў аленя, а сам праз гэта зваліўся і скаціўся ва ўсыпаны камянямі каньён. Лежачы там, я пачуў гукі вады. Ідучы да іх, я знайшоў мілую пару, якую абагнаў раней, - яны спакойна абедалі ля вадаспаду.

Я расказваю гэта, каб праілюстраваць жыцьцё: і пара, і я дайшлі да мэты, але я абраў не самы лепшы і прыемны шлях туды. Гэта добра адлюстроўвае сучасныя сустрэчы. Людзі знаходзяць сваё каханьне штодня. Але шлях да яго займае нашмат болей часу - многія людзі бяруцца шлюбам ужо пасьля трыццаці год. У мінулыя гады шляхі былі лепшымі, а цяпер мы прабіраемся праз пустыню без рыштунку, без кіраўніка і амаль без ежы. Мы даходзім да мэты, але па дарозе нам моцна дастаецца.

Правілы сустрэчаў сталі двухсэнсоўнымі і няпэўнымі. Сустрэчы павінны зьвязвацца з такімі словамі, як весялосьць, жыцьцярадаснасьць і натхненьне. Але пакуль што я чую адносна сустрэчаў такія словы як нудны, утомны і стрэсавы. Я люблю сваіх маладых несямейных сяброў і жадаю ім лепшага падарожжа. І лепшае падарожжа магчымае! Шлях да каханьня можа быць балючым, але ёсьць спосаб прайсьці па ім без непатрэбнага болю.

Шмат нязручнасьцяў сёньня выклікае недахоп намеранага працэса сустрэчаў. Зьвярніце ўвагу, я кажу працэс—у сэнс гэтага слова закладзены рух. Сустрэчы павінны быць серыяй дзеяньняў, якія вядуць да прадвызначанага завяршэньня. Гэта не статус, у якім вы знаходзіцеся нерухома. Яны мусяць быць працэсам ацэнкі, які мае канцавы пункт - прызначэньне, якое называецца шлюбам.

Гэтаму працэсу ўласьцівыя вечныя прынцыпы, якія караняцца ў якасьцях і любові Бога. Заўважце, я называю іх прынцыпамі, а не крокамі. Крокі былі б лягчэйшымі - проста выконвайце інструкцыю, і створыце шчасьлівую сям'ю! Сустрэчы так не працуюць, бо адносіны занадта дынамічныя. Сустрэчы больш падобныя да плаваньня праз акіян, а не зборкі нейкай рэчы. Крокі не спрацуюць, калі вы плывеце праз акіян на чоўне. Немагчыма атрымаць пакрокавыя ўказаньні, бо асяродзьдзе вельмі зьменлівае. Хто ведае, якія штормы чакаюць вас наперадзе?

Ўратаваць ваша жыцьцё ў моры могуць прынцыпы. Веданьне таго, як пракладваць дарогу па зорках, як карыстацца компасам, як пракладваць курс з дапамогай мапы і сэкстанта, дапаможа вам ў плаваньні. Падобным чынам прынцыпы сустрэчаў могуць дапамагчы вам справіцца з любой патэнцыйнай складанасьцю. Гэтая інфармацыя давядзе вас ад берагоў несямейнасьці да порта шлюба.

Прынцыпы, якія будуць разглядацца ў наступных двух частках, запатрабуюць таго, каб вы прыклалі да іх розум і сэрца. Спатрэбяцца высілкі. Але гэтыя высілкі стануць прыгодай (хаця і не без рызыкі), дзеля якой варта ісьці наперад. Гэтыя асноўныя прынцыпы - калі вы будзеце ўжываць іх датычна зьменлівага асяродзьдзя сустрэчаў - бясьпечна правядуць вас праз іх бурныя воды.

Адкажыце

Якія словы ў вас асацыююцца з сустрэчамі? Якія вашы чаканьні адносна таго, як сустракацца? Які ваш настрой?

Што значыць, што сустрэчы павінны быць працэсам? Якія дзеяньні значаць удзел у працэсе сустрэчаў? Якая ваша мэта на гэтым шляху? Калі вы не зацікаўленыя ў шлюбе, якія варыянты ў вас ёсьць для здаровых адносінаў?

Над якімі навыкамі адносінаў вам трэба працаваць дзеля пасьпяховых сустрэчаў? Як вы слухаеце, назіраеце і ацэньваеце людзей, з якімі сустракаецеся? Як гэты працэс можа быць прыгодай?