Боскі кірунакУзор

Давярай

Я жыву ў штаце Аклагома, дзе надвор’е можа зьмяняцца вельмі хутка і ў значнай ступені. Аднаго году ў сакавіку ў нас быў прыгожы, сонечны вясновы дзень і аж 28 градусаў. Наступнага дня нанесла амаль 8 см сьнегу. Гэта была, вядома ж, надта вялікая зьмена, але гэта нічога ў параўнаньні з тарнаднай парою, калі здаецца, што віхры ўздымаюцца ніадкуль.

Гэтак і ў нашым жыцьці.

Надоечы падчас футбольнае гульні майго сына я размаўляў з адной кабетай, якая мела праблемы са здароўем. Яна патлумачыла, што шмат гадоў таму яна мела блізкія адносіны з Богам і раней актыўна ўдзельнічала ў царкоўным жыцьці. Але калі яна пачала праходзіць празь вельмі цяжкія выпрабаваньні, то яна пачала дзівіцца, навошта Бог дазволіў гэта. Стрымліваючы сьлёзы, яна сказала: “Як я магу пакланяцца Богу, якому я не магу давяраць?”

Ці мы будзем верыць, што Бог ёсьць добры, нават калі жыцьцё ня ёсьць добрае?

Пытаньне гэтае кабеты трапляе проста ў сэрца аднаго з найвялікшых рашэньняў жыцьця. Ці мы будзем верыць, што Бог добры, нават калі жыцьцё ня добрае? Нашая рэакцыя на боль і цяжкасьці мае вялікі ўплыў на нашую будучыню.

Па характары, вера патрабуе даверу нечаму — або некаму — што не заўсёды зьяўляецца прадказальным або зразумелым паводле людзкіх мерак. Шчыра кажучы, бальшыня з нас хоча мець неабвержны доказ добразычлівай Божай прысутнасьці ў нашым жыцьці.

У гэтым няма нічога новага. Ці ты памятаеш недаверніка Тамаша? Па тым, як Ісус памёр на крыжы й уваскрос, Тамаш сказаў, што не паверыць, пакуль ня ўбачыць на свае ўласныя вочы. Заміж таго, каб раззлавацца й прагнаць яго за ягоны недахоп веры, Ісус ласкава паказаў Тамашу Свае рукі з ранамі ад цьвікоў.

А памятаеш вучняў падчас буры? “І сталася вялікая бура, і хвалі білі ў човен, так што ён ужо напаўняўся вадою.” Марка 4:37. У той буры вучні не былі адны. Марк нагадвае нам у наступным вершы, што Ісус спаў на карме чоўна.

Калі Ісус знаходзіцца ў тваім чоўне, бура можа моцна гайдаць цябе, але ты не патонеш.

Людзі як ты й я, кабета з футбольнае гульні, Тамаш і вучні, маюць тэндэнцыі думаць, што мы ніколі ня трапім у буру, калі Бог сапраўды знаходзіцца з намі. Але тое ня ёсьць праўдай. З Ісусам у тваім чоўне, бура можа моцна гайдаць цябе, але ты не патонеш. Ён з табой падчас вясновага дожджыку і падчас найгоршага тарнада.

І Ён ня проста з Табой, Ён за цябе. А калі Ён за цябе, то хто можа быць супраць цябе? Давярай Богу ва ўсім, у чым яшчэ не давяраеш. Давярай Яму наконт твайго будучага шлюбу. Давярай Яму наконт тваіх дзяцей. Давярай Яму наконт твайго прафэсійнага жыцьця. Давярай Яму наконт твайго здароўя. Давярай Яму наконт тваіх фінансаў.

Давярай Яму без агаворак.

Кропка.

Памаліся:Нябесны Тату, я давяраю Табе ўва ўсім, што я пачну й кіну. Я давяраю Табе наконт таго, куды пайду і дзе застануся. Я так моцна давяраю Табе, што аддам маё жыцьцё на тое, каб служыць і будаваць адносіны зь людзьмі. І я веру, што Ты прысутнічаеш ува ўсіх бурах майго жыцьця. Дзякую Табе за тое, што Ты побач, што Ты накіроўваеш мае крокі й даеш мне боскі кірунак. Амін.

Даведайся больш пра маю кнігу Divine Direction (Боскі кірунак).