Любіць як ІсусУзор

Усё прабачана

Я выгадаваўся ў царкве, але шчыра кажучы, я жыў так, нібыта Бог не існаваў. Калі ў школе або на працы зьяўляліся магчымасьці праявіць любоў да іншых, я іх ігнараваў. Я быў невыносным. Я быў эгаістычным і фанабэрыстым. Думаючы пра мінулае, я магу сказаць, што на мяне ўплывала шмат адмоўных рэчаў: ня тыя сябры, таксычныя адносіны, праміскуітэт, парнаграфія і алькаголь. Я трапіў у дрэнную кампанію, хлусіў бацькам, хлусіў сябрам, піў і старанна гадаваў сваё эга. Яшчэ ня скончыўшы каледж, я нарабіў шмат жахлівых рэчаў, што руйнавалі маё цела і жыцьцё.

Перанясемся зараз у 2010 год. Да Вялікадня заставалася некалькі тыдняў. Маю сям'ю запрасілі ў Life.Church. Апошні раз мы былі ў царкве некалькі гадоў таму. Гэта быў вызначальны для мяне і маёй сям'і час, і тое запрашэньне прыйшло як раз тады, калі трэба было. Увайшоўшы ў царкву, мы адчулі сябе прынятымі, усе былі з намі вельмі ветлівымі. Я ніколі раней не адчуваў сябе так у царкве. Падчас таго першага служэньня, якое мы наведалі, я ўпершыню адчуў Божую любоў і прабачэньне. Казань была пра прабачэньне, і я нарэшце зразумеў гісторыю пра Ісуса і Ягоную любоў. Не чакаючы ні хвіліны, я тады вырашыў аддаць сваё жыцьцё Хрысту. Я адчуў, як Бог ачысьціў мяне ад усяго дрэннага, што я нарабіў, і я стаў новым чалавекам. Але гісторыя ня скончылася на гэтым. Я зразумеў, што мне была патрэбна падтрымка. Я хацеў далучыцца да малое групы - невялічкае групы людзей, якія жывуць жыцьцё разам. Я знайшоў адну такую моладзевую групу, якая зьбіралася штоаўторак, і пачаў наведваць яе. Менавіта там усё і зьмянілася.

Гэтыя сябры любілі мяне, прымалі мяне, і паказвалі мне, як выглядае жыцьцё дзеля Хрыста. Я ніколі не забудуся, як гэтыя людзі любілі мяне так, як Ісус. Яны прынялі мяне такім, якім я быў, дапамаглі мне атрымаць перамогу над маёй мінуўшчынай і пачаць жыць новае жыцьцё, якое Бог меў дзеля мяне. Я адчуў сябе прынятым і мяне не судзілі за тое, што я нарабіў. Яны праявілі да мяне любоў і далі падтрымку, якой мне гэтак моцна тады бракавала. Бог выкарыстаў гэтую маленькую групку моладзі, каб ператварыць мяне ў чалавека, якім я зьяўляюся цяпер. Сёньня я належу да царкоўнага пэрсаналу, што кіруе малымі групамі, і мне даводзіцца чуць шматлікая гісторыі пра тое, як Хрыстова любоў зьмяняе жыцьці людзей. Бог можа зьмяніць і тваё жыцьцё, і часьцей за ўсё Ён зробіць тое празь людзей навокал цябе.

Спэнсар Эстан з царквы
Life.Church у Броўкэн Эраў