Жыцьцёвыя правілы, якіх варта прытрымліваццаУзор

Слухаць Бога, хадзіць з Богам

Жыцьцёвае правіла нумар 13: Слухаць Бога неабходна для таго, каб хадзіць зь Ім.

Адзін з найважнейшых урокаў, якія мы можам засвоіць, – гэта як слухаць Бога. У нашым складаным ды бурным жыцьці няма нічога больш важнага, нічога больш неабходнага й нічога больш задавальняючага за тое, каб чуць, што Бог жадае сказаць нам, а потым слухацца Яго.

Магчыма, вы спытаецеся: «Хіба Госпад сапраўды прамаўляе да нас сёньня?» Біблія запэўнівае нас, што Ён сапраўды тое робіць. Ліст да Габрэяў пачынаецца наступным чынам: «Бог, Які шмат разоў і шматлікімі спосабамі здаўна гаварыў да бацькоў праз прарокаў, у апошнія гэтыя дні прамовіў да нас праз Сына» (Габрэяў 1:1-2). Наш Бог не маўклівы. Наш нябесны Бацька жывы ды актыўны. Ён прамаўляе да нас індывідуальна і так, каб мы маглі Яго пачуць, зразумець Ягонае паведамленьне ды слухацца Яго. Ён бязьмежны, цалкам здольны прамаўляць да нас вельмі асабістым спосабам у нашых абставінах.

Магчыма, што гэта будзе адным з найважнейшых агульных паняцьцяў, якія вы зразумееце, вучачыся слухаць Бога. Калі Госпад прамаўляе, то Ён прамаўляе да вас. Божае Слова зьмяшчае Ягоную праўду, таму прымайце Яго асабіста. Дазвольце Сьвятому Духу адкрыць вашае сэрца, каб у вас зьявілася больш глыбокае разуменьне Сьвятога Пісьма. Калі яно ў вас будзе, то вы зможаце пачаць заяўляць вашае права на Ягоныя абяцаньні для вашага жыцьця. Вы таксама будзеце лепш разумець Ягонае забясьпечаньне, руплівасьць ды любоў.

Бог вельмі сур’ёзна падыходзіць да Сваіх узаемаадносінаў з вамі. Ён прамаўляе на вашую карысьць, і важна, каб вы чулі Яго і адказвалі паслушэнствам. Часам Ён запросіць вас зьмяніць ход вашых думак альбо адмовіцца ад канкрэтных нездаровых пачуцьцяў ды поглядаў. Часам Ён загадае вам зьмяніць нейкія аспэкты вашых паводзінаў. Але якія б інструкцыі Ён вам ні даваў, вы можаце быць упэўненыя, што Ён робіць тое дзеля вашае карысьці. Ён жадае падбадзёрыць вас ды дапамагчы вам стаць больш дарослымі духоўна дзеля таго, каб вы маглі жыць з большай радасьцю ды моцай. Ён таксама хоча зрабіць вас больш падобнымі да Свайго Сына, Ісуса Хрыста, дапамагаючы вас стаць найлепшай асобай, якой вы можаце быць.

Навучыцца слухаць Бога праз чытаньне Ягонага Слова – гэта найважнейшая рэч, якую вы можаце зрабіць, бо гэта адзіны спосаб цешыцца цудоўным, багатым жыцьцём, якое Ён прапануе. Дык слухайце ўважліва тое, што Ён маецца сказаць, і Ён абавязкова пакажа вам «вялікае і недаступнае, чаго ты ня ведаеш» (Ераміі 33:3).