لشهر يونيو؛ رحمات جديدة كل صباحعينة

إلا كنتي ولد الله، ملّي كتدنب، تقدر تهرب لعند الله وماشي تهرب منّه، حيت كل دنوبك غطّاها دم يسوع.

كاينين جوج مشاهد متناقضين بزّاف، واحد المشهد كاين في البدية ديال الكتاب المقدس ولاخر في الأخير. في المشهد ديال البدية، كنشوفو آدم وحواء كيغطّيو ريوسهم بالزربة وكيتخبّعو من الله في الإحساس بالدنب والعار اللّي هما النتيجة المحزنة ديال دنبهم (تكوين 3). هادي كارتة خايبة بزّاف لدرجة صعيب نعبرو عليها بالكلمات المحدودة اللّي في اللغات البشرية. تباركو بعلاقة بلا عوائق مع الرب، الخالق، ملك الكون، تباركو بجنة خضرة فيها كل حاجة مزيانة، بالحق كان عندهم كلشي. خلقهم الله وصنعهم ليه. كان من المفروض يكون هو المركز ديال حياتهم. تخلقو باش يستمتعو بعلاقة أبدية معاه. كانت محبتهم ليه وعبادتهم ليه هما جوج دوافع رئيسيين لكل حاجة داروها. كيفاش كان ممكن هاد الرابط يتهرّس بهاد السرعة؟ كيفاش كان ممكن يخافو من الله؟ كيفاش كان ممكن يحاولو يتخبّعو من هادا اللّي كان السبب في وجودهم كلّه؟ حزين نعرفو هادشي، ولكن الجواب على هاد الأسئلة هو واضح: الخطية، مع التقل ديالها ديال الإحساس بالدنب والعار، فصلاتهم على الله وخرجاتهم من الجنة ديال حضوره وتدبيره. ديك العلاقة تهرسات. كيفاش ممكن تصلح؟

المشهد الثاني هو العشا في عرس الحمل (رؤيا 19). حتّى هو تجمّع ديال الخطاة، ولكن تمّا هما ماغارقينش في العار. هما مامخبعينش في الإحساس بالدنب. هما مامخلوعينش من حضوره. هما ماخايفينش من القوة ديال الغضب دياله. لا، هاد الخطاة فرحانين حيت العلاقة اللّي تهرسات في الجنة دابا تصلحات. تزوجو مع المُنجّي ديالهم للأبد. للأبد غيكونو في حضوره. ماعمّرهم غينفصلو عليه عاوتاني. ماعمّرهم يتخبعو عاوتاني. ماعمّرهم يتطردو عاوتاني. علاقتهم ماعمّرها تسالي. صوت فرحتهم ماعمّره يهدا. لباسهم تغسل وولّى بيض ناصع. لبسو لباس التقوى ديال شخص أخر. هما مقبولين بسبابه. ماكاينش حكم عليهم. ماكايناش خطية تفرق بينهم. هادا مشهد عامر بالجمال الخلاب لدرجة أن الوصف دياله غيجر اللغة البشرية لحدود بعيدة من قدرتها.

شنو اللّي دار الفرق بين هاد جوج مشاهد؟ ماشي الحكمة البشرية أولا القوة أولا المناصب أولا التقوى. الفرق كنشوفوه في كلمة وحدة مجيدة كتغيّر. من بعد اسم يسوع، هاد الكلمة تقدر تكون هي الأكثر أهمية في كل الكتاب المقدس: النعمة. النعمة في الشخص والعمل- الحياة والموت والقيامة- ديال يسوع هي اللّي دارت الفرق. إلا كنتي ولد الله، حبس تتخبّع مورا الأشجار ديال العار ديالك. خرج للنور. كاين فرح في المستقبل ديالك!

من أجل دراسة وتشجيع كتر: رؤيا 21