Gesprekke Met GodVoorbeeld

Ek gebruik 'n deel van die somervakansie om doelwitte op te stel en kirrikulums te bestel vir my kinders se tuisonderrigprogram. Die somer van 1999 het nie veel verskil nie, behalwe dat ek verwagtend was met ons sewende kind. Ek moes alles haarfyn bedink voordat ek nie meer tyd gehad het vir dink nie. 

Na baie beplanning was daar nog een gewigtige besluit om te neem. Ons jongste kind, Samuel, wat net vier jaar oud was, het gesukkel om te praat. Ek het gedink dat spraakterapie hom sou help. Maar dit sou baie moeilik wees om sulke afsprake ingepas te kry in ons besige skoolrooster. Maar wat as dit die jaar was waarin Samuel die vatbaarste sou wees vir sulke terapie en ek te lui was om hom te vat? 

Ek onthou baie duidelik die Saterdagmiddag toe ek gaan stap het om met die Here te gesels. Ek het vir Hom gesê: "Ek moet weet of Samuel hierdie jaar nog spraakterapie moet kry en of dit nog 'n jaar kan wag, tot hy vyf is? Dit was so eenvoudig en spesifiek. Stilte het gevolg, maar ek was nie mismoedig nie. Die Here sou my wys wat om te doen. Ek het dit geweet, want Hy het nog altyd. Ek het met verwagting aanbeweeg.

Die volgende dag was Sondag, en ons gesin was in die kerk soos gewoonlik. Toe die preek begin, het ons pastoor, Jessica Moffatt, ons verras deur in die paadjie afgestap te kom, aangetrek soos Susanna Wesley. (John Wesley, die stigter van die Metodiste kerk, se ma) In die monoloog wat gevolg het, het sy beskryf hoe dit was om 'n ma van 19 kinders te wees! Sy het haar afhanklikheid van God beskryf, en toe haar kommer oor haar seun Samuel uitgespreek. Ek het regop gesit. "Susanna" het verduidelik dat Samuel Wesley vyf jaar oud was en nog nooit 'n enkele woord gepraat het nie. Een dag het hy net ewe skielik in volsinne begin praat.

Terwyl ek in die derde bank van voor sit en luister, het ek duidelik die Here se stem gehoor: "Dis nie nodig vir Samuel om te praat totdat hy vyf is nie. Wag tot volgende jaar om hom spraakterapie te laat kry." Vrede en vertroue het my planne vergesel. Samuel het die volgende jaar spraakterapie gekry en sy uitspraak het dramaties verbeter. 

Die Here wil hê dat ons spesifiek moet wees as ons Hom iets vra, en deur sy wil gelei word. Hy gee regtig om vir die klein besonderhede.