HEN EN KUIKENS

Jesus stort hartseer sy hart uit wanneer Hy Jerusalem aanspreek. Miskien staan Hy op een van die talle heuwels rondom Jerusalem en kyk af op hierdie pragtige stad. Die Godstad. Sion. Die hoofstad van die volk Israel, God se verbondsvolk. Die hoofstad is mos altyd die hart van ’n volk, die kern wat die gees van ’n nasie simboliseer.

Jesus is hartseer omdat die onheil teen Hom en die koninkryk wat Hy verkondig het in hierdie stad gebroei het. Hy het ’n doodsdreigement ontvang en weet dat daar verwerping, pyn en dood vir Hom wag. Dit is die leiers van die volk uit Jerusalem wat dit aan Hom sal doen. Tog het Hy soveel mense genees, gehelp, bevry en na God toe getrek deur sy liefde. Ten spyte hiervan wil hulle Hom doodmaak.

Hulle het die profete deur die dekades heen doodgemaak. Boodskappers wat God na hulle toe gestuur het, is met klippe doodgegooi. Hulle het teen God gerebelleer en het dit gewys deur God se volgelinge te breek.

Nou gebruik Jesus ’n pragtige beeld: dié van ’n hen wat begeer om haar kuikens veilig onder haar vlerke te bêre, miskien omdat daar ’n roofdier is wat hulle wou verslind of miskien omdat daar ’n dreigende haelstorm was. Só, sê Jesus, wou Hy Jerusalem versamel, beskerm, help, troetel, toevou. Maar hulle wou nie.

Dit wil Hy ook vir my en jou doen. Sy hart breek as ons Hom wegwys, omdat Hy weet wat dan vir ons wag: die roofdier, die storm. Kom ons vlug onder sy vlerke in.