Doen dit vir die Here

Broer Lawrence was ’n Franse monnik wat in die sewentiende eeu geleef het. Hy het dit gehaat om in die klooster se kombuis te werk. Algaande het broer Lawrence egter ontdek dat hy God net so goed agter sy potte en panne kon dien as in die klooster self. Toe sy gesindheid teenoor sy werk verander het, het dit vir hom ’n vreugde geword.

Jesus het Marta nie betig omdat sy gewerk het nie, maar omdat haar werk haar geïrriteer het. Om hierdie rede lê die meeste huisvroue se simpatie gewoonlik by die besige Marta en nie by Maria wat by Jesus se voete gesit en na Hom geluister het nie. Soos Marta wonder ons ook waarom óns al mense is wat die werk moet doen en hoekom niemand ons help kosmaak, opruim en skottelgoed was nie. Soos Marta raak ons ook maar vies in die kombuis voor die stoof en opwasbak wanneer die res van ons huismense lekker in die sitkamer sit en gesels. Indien jy egter die huiswerk wat jou irriteer in die vervolg vir die Here doen, kan jy jou huishoudelike sleurwerk in ’n aanbiddingsdaad omskakel sodat jou huiswerk nie meer vir jou ’n kruis gaan wees nie, maar ’n vreugde waarin jy die teenwoordigheid van God ervaar.

Here, ek wil van nou af my lastige sleurwerk vir U doen so­dat dit vir my ’n vreugde word. Amen.

Hierdie oordenkings is geneem uit ’N LEWE NABY GOD deur Nina Smit © Christelike Uitgewersmaatskappy.