Die Wonder Van KersfeesVoorbeeld

"Onderbreking"

Jesus se geboorte was 'n glorieryke onderbreking — 'n onderbreking in die wêreld se geskiedenis. Op 'n persoonlike en intieme vlak, was dit ook 'n onderbreking in die lewens van sy aardse ouers, Maria en Josef. Hulle het wel beplan om te trou, maar hulle het nie 'n swangerskap beplan wat deur God verwek is nie. Hulle het nie beplan dat Maria die moeder van die wêreld se Verlosser sou word nie.

God het selfs die skaapwagters se daaglikse werk — om daar teen 'n heuwel hul skape te versorg — glorieryk onderbreek!

Lukas 2:13-14 sê: "Skielik was daar saam met die engel 'n menigte engele uit die hemel wat God prys en sê: 'Eer aan God in die hoogste hemel, en vrede op aarde vir die mense in wie Hy 'n welbehae het!'"

Op hulle beurt, het die skaapwagters onderbreek wat van hulle verwag was en dadelik die Jesus-baba gaan soek. Soveel spontaneïteit — daardie skaapwagters het eenvoudig alles net so gelos, want God het hul roetine onderbreek!

Gedurende hierdie Kersfeestyd, wanneer ons so besig is met God se werk, maak ook seker dat jy tyd, ruimte en energie behou om vir die onverwagte beskikbaar te wees. Laat God toe om jou lewe te onderbreek! Dalk begeer Hy om jou daaglikse siening van die lewe te verander. Het jy al moeg of selfvoldaan geword, of dalk 'n bietjie verveeld op jou reis saam met God?

Miskien het jy al genoeg van 'n situasie of persoon gehad — jou blus is heeltemal uit. Dit is moontlik tyd dat jy ophou om voor te gee dat alles goed en reg is en jy alles kan hanteer. Jy kan maar "amen" sê! God wil jou reis in heerlikheid onderbreek en jou tot 'n hoër vlak van vrede en intimiteit in jou kennis van Hom ophef. Breek weg uit jou roetine, weg van dit wat van jou verwag word, en laat toe dat jy in hierdie Kersfeestyd glorieryk onderbreek word!

Jána Guynn
Service Programming