Wanneer ’n Geliefde SterfVoorbeeld

Gaan ek ooit weer vrede ervaar?

Vrede verdwyn as ’n mens diep hartseer is. Vrede — kalmte van gemoed — is skaars tydens rousmart. Maar vrede in sy volle betekenis, naamlik dat alles in orde is, is dan amper onmoontlik, want die groot leemte maak die lewe mos nié in orde nie.

Gemoedskalmte voel beslis onmoontlik. Juis die teenoorgestelde is waar: Jy beleef ontsteltenis, hartseer, pyn, magteloosheid, woede. Dis nie vrede nie! En die belofte van Filippense 4:7 voel heeltemal onbereikbaar. Dit voel nou eerder soos “onrus wat meer is as wat ’n mens kan dink”. Hoe kry jy vrede?

Voor die belofte van vers sewe, kry ons ’n metode, en dit is om vir God van alles te sê wat ons nodig het. Dit beteken dat elke gebedsgesprek jou ’n bietjie nader aan daardie vrede gaan bring. Gebed aktiveer die krag van God wat my smekinge ’n werklikheid sal maak.

Natuurlik gaan een gebed nie onmiddellike vrede bring nie. Tog bring elke gesprek met die Here ’n stukkie kalmte. Jy kan die vrede wat jy op ’n spesifieke oomblik beleef, weer verloor, maar jy gaan dit beslis weer terugvind. Dis die belofte.

Watter dinge is daar in jou gemoed waarvan jy die Here moet vertel voordat jy vrede gaan ervaar?

God van vrede, kan ek asseblief die lang lys dinge wat my ontstel een vir een vir U opnoem? Ek wil dit hardop sê sodat dit meer afgehandel voel. Sal U my dan asseblief u vrede gee? Amen.