In Jesus Is Jy...Voorbeeld

In Jesus is ek Bekragtig

Lees: 1 Korintiërs 12:4-11; 2 Korintiërs 12:9; Filippense 4:13

SOAP: Filippense 4:13

“Ek is tot alles in staat deur Hom wat my krag gee.”

Oordenking

Ons is voortdurend omring deur die uitroepe van die wêreld wat ons vertel dat ons enigiets kan doen en enigiets kan wees wat ons wil, solank ons hard genoeg werk, gereeld genoeg probeer of genoeg goed kan koop. Ons kan daardie promosie op ons eie verdien as ons eenvoudig beter is as almal. Ons kan ’n wonderlike lewe vir onsself bou, solank ons genoeg het, genoeg maak en onsself met die regte mense omring.

In God se koninkryk is ons op ons sterkste wanneer ons swak is, en ons is op ons onafhanklikste wanneer ons van God afhanklik is. Ons vers van vandag beteken nie dat ons alles moet doen nie, maar dat ons vreugde kan vind wanneer ons op God vertrou om ons te bekragtig en toe te rus om die werk te doen waarvoor Hy ons roep.

Aan die einde van sy brief aan die kerk in Filippi het Paulus die tyd geneem om sy waardering vir hul ondersteuning van sy bediening te toon. Hy het opgemerk dat sy vreugde van die Here kom, nie van sy omstandighede nie. Alhoewel hy tye van armoede en tye van oorvloed beleef het (Filippense 4:12), het Paulus gesê dat ware tevredenheid die gevolg was van die die wete dat sy krag van Jesus gekom het.

In Jesus word ons bekragtig om alles wat die lewe vir ons het, te navigeer deur die krag wat ons in Hom het. Wanneer ons vreugde en ons identiteit in Christus gewortel is, sal ons omstandighede ons nie van stryk bring nie. Ons koersvaste, vreugdevolle lewens sal ’n getuienis wees van die genade en liefde van Jesus wat ons in alles en deur alles onderhou.

Gebed

Hemelse Vader, die wêreld probeer vir my sê ek kan dit alles op my eie doen, dat ek in my eie krag alle dinge kan doen en alles vir alle mense kan wees. Help my om daardie uitroepe stil te maak, sodat ek ten volle op U kan staatmaak om my krag en my vreugde te wees, terwyl U my bekragtig om alle situasies en omstandighede te navigeer op wyses wat vir U glorie en eer bring. Amen.