Wat Behels Aanbidding?Voorbeeld

Ons aanbid deur ons wil aan God te onderwerp.

Ons moet nooit rus voordat alles in ons nie vir God aanbid nie. —A.W. Tozer

Hierdie stelling van Tozer is 'n moeilike opdrag, is dit nie? "Alles in ons, God? Regtig? Wat van omtrent 73% van ons innerlike? Is dit genoeg? Kan ons 27% van ons eie wil behou en dinge op ons manier doen? Ons kan, maar dit sal tot ons voordeel strek as ons alles oorgee. Moenie mislei word nie: jy is allesbehalwe 'n swakkeling as jy jou wil prysgee. Dis een van die moeilikste dinge wat jy ooit sal doen. En tog kan dit terselfdertyd een van die mees bevrydende en vreedsame aksies wees.

Ons word van alle kante af gebombardeer met dinge wat om ons aandag meeding. Nie net "dinge" nie, maar geleenthede, idees, drome, denkpatrone en planne wat wonderlik lyk. Dit blyk sin te maak in 'n samelewing wat teen God immuun geword het. God roep ons egter tot 'n hoër standaard. 

Een waar ons ons eie agenda verwerp vir 'n hoër doel. 
Een wat ons aan "sy goeie, aanneemlike en volmaakte wil" sal bekendstel. 

As volgelinge van Christus, is ons geroep om sy doel, en nie ons s'n nie, te vervul. Om Hom met ons hele hart lief te hê, ongeag al die ander dinge wat om ons toegeneentheid meeding. Om ander lief te hê soos onsself. (Dis baie gevra.) Om sy Naam bekend te maak en op sy nalatenskap voort te bou, eerder as om te verseker dat my eie naam bekend word. 

Sê nou ons kies, te midde van die versoekings wat die wêreld inhou, om nie aan die standaarde te voldoen wat ander mense as normaal beskou, of nog erger, van ons verwag nie? Sê nou ons wil ons eerder onderwerp aan dit waartoe Hy ons roep? Ons is geroep om al ons toegeneentheid op 'n liefdevolle God te fokus, wat ons baie liefhet — en nie om die materiële besittings wat hierdie wêreld bied — te aanbid nie. 

Hierdie God, wat ons vir die res van ons lewens kan aanbid, is goed. Sy planne is skouspelagtig en Hy nooi ons uit om by Hom aan te sluit. Selfs die buitensporigste en wonderlikste idees wat ons van 'n goeie lewe het, kom nie eens naastenby by die planne wat Hy vir ons het nie. 

Ons God is magtig, majestieus, alwetend en slaap nooit nie. Hy is die Skepper van die wêreld, Hy het die see gemaak, Hy ry op die wind, Hy gee vir die sterre name, Hy vergewe ons sonde en is die gewer van vreugde. God is heilig, goed, groot en die geneser van gebroke harte. Hy het ons so baie lief.

Kom ons gebruik nou die res van ons lewens om Hom te aanbid.

Oordink

• Lees Psalm 96 en verklaar dit aan jou God terwyl jy lees.
• Vra vir God om enige doelwitte of planne wat jy oorweeg, wat nie sy wil vir jou is nie, aan jou te openbaar. 
• Skryf enige openbaring neer wat God aan jou gegee het tydens vandag se Skriflesing en oordenking.