Wat Behels Aanbidding?Voorbeeld

Ons aanbid met musiek.

Aanbidding: Waar God nie beïndruk is met die kwaliteit van ons stemme nie, maar met die toestand van ons harte. —Chris Tomlin

Ons het genoem dat aanbidding minder oor aktiwiteit gaan as oor 'n hartsingesteldheid waar God hoog geag word. Die plek waar God bo-aan iemand se prioriteitslys is. 

Ons aanbid God die meeste van die tyd met musiek. Dis te verstane. Ons kan in die motor, by die gimnasium en tuis daarna luister. Musiek is inderdaad 'n gewilde manier om ons Skepper te aanbid. 

Aanbidding is 'n heilige ontmoeting met ons God. Dit is beide 'n buitensporige uitdrukking en 'n ingetoë stilte. Dit is sang en dit is stilte. Dis om stil te wees en te weet dat Hy God is, en dis 'n viering met baniere en dans. Dit maak nie saak watter soort lied ons sing nie. Of dit nou musiek van die gewildste groep op die aanbiddingsplatform is, of 'n gesang wat in die 1700's geskryf is, die styl is nie van belang nie — die ingesteldheid van ons harte maak saak.

Wanneer ons 'n weeklikse aanbiddingsdiens bywoon, lig ons dalk ons hande hoog in die lug op. Of ons aanbid op 'n stil manier, met toe oë. Ongeag of ons nou fisiek uitdrukking gee of ingetoë nederig is, ons oorvloedige, of gebrek aan uiterlike optrede, gee ons nie die reg om enigiets oor enigiemand te veronderstel nie. 'n Gebrek aan fisieke uitdrukking is nie 'n bewys van 'n geestelike leemte nie, net soos fisieke uitbundigheid nie beteken dat iemand diep geestelik is nie. As ons dade net uiterlik is, is dit nie aanbidding nie. Dis maar net vertoon. 

Aanbidding gaan minder oor 'n opsigtelike uitdrukking en meer oor 'n innerlike ingesteldheid. 'n Houding waar geklemde vuiste oopgemaak word, nooi God om dit met sy onbegryplike vrede en liefde te vul. Of ons dus ons hande oplig of op die grond neerval, ons aanbidding moet kom uit 'n hart wat ingestel is om God te prys. 

Aanbidding is egter nie vir ons nie. As ons wonder hoe ons daarby gaan baat vind, mis ons die teiken. Trek ons voordeel daaruit deur God te aanbid? Natuurlik. Ons ondervind dalk 'n vredevolle tyd of gaan deur 'n stormagtige tyd. Wanneer ons aanbid, vul 'n onverklaarbare troos en hoop ons geestelik. Hierdie onverklaarbare vertroosting vind plaas omdat aanbidding ons fokus van die tydelike na die ewige verskuif. Daar is nie voldoende woorde of mooi uitdrukkings wat kan verduidelik wat aanbidding vir die gees doen, wanneer ons elke dag ons bewondering en danksegging aan God bied nie, veral op daardie dae wanneer ons neerslagtig is. 

Kom ons maak aanbidding met musiek deel van ons daaglikse roetine. Ons behoort ons vryetyd te vul met liedere wat ons aanspoor om ons wonderlike God te aanbid. Hy is dit altyd waardig.

Oordink

• Lees Psalm 150 en verklaar dit aan jou God soos jy dit lees. 
• Wees vir 'n rukkie stil, of luister na 'n aanbiddingslied — wat jy ook al verkies. Aanbid God.
• Skryf enige openbaring neer wat God aan jou gegee het tydens vandag se Skriflesing en oordenking.