Koninkryksdissipels met Tony EvansVoorbeeld

Individu en Gesin 

Die roeping om 'n koninkryksdissipel te wees, affekteer ons lewens in al vier gebiede van God se koninkryk. Vandag gaan ons die eerste twee bestudeer: ons individuele en gesinslewens. 

Ek het nie ryk grootgeword nie. Ek het grootgeword in 'n ry skakelhuise in 'n stedelike gemeenskap
in Baltimore, waar my ouers moes raap en skraap. Baie van julle ken hierdie verhaal omdat julle dit self beleef het. Soms moes my ma 'n manier vind om die vis wat my pa gevang het vir ontbyt, middagete, aandete en nagereg voor te berei. Ten spyte van hierdie werklikheid, het ek nooit bekommerd gaan slaap nie. Die gewig van die lewe het my nie ondergekry nie. Die rede hoekom ek nooit as 'n jong kind met die juk van die lewe gesukkel het nie, was omdat dit my ouers se probleem was. Dit was hulle bekommernis. 

Gevolglik was die vraag of ons môre kos gaan hê, nooit iets waaroor ek my bekommer het nie. Toe my pa as dokwerker afgedank is en weke sonder werk was, was ek nie gespanne nie. Ek het staatgemaak op diegene wat verantwoordelik was om vir ons te sorg. Ek kon rustig wees omdat ek my ouers vertrou het en in 'n bewustelike afhanklikheid van hulle gelewe het. 

As 'n volwassene verstaan ek egter dat die lewe se laste mense kan onderkry. Ek het dit self ondervind as 'n jong man met vier jong kinders, 'n vrou en die uitdaging om voltydse studie met die versorging van my gesin te balanseer. Ten spyte van al die spanning wat ons as volwassenes moet dra, sê Jesus dat, as ons eenvoudig in dissipelskap as individue en gesinne groei, ons rus kan hê. Ons kan een van die grootste voordele beleef van aan Hom te behoort: vrede. 

Die oplossing tot die lewe se laste word nie in jou kennis, sukses of begrip gevind nie. As 'n ware koninkryksdissipel het jy toegang tot die beskerming van die Vader en die wysheid wat Hy aan jou oordra, terwyl jy onder sy heerskappy en in 'n blywende verhouding met Hom leef. Sy beskerming en wysheid sal jou lewe radikaal verander en jou van alles voorsien wat jy nodig het om in oorvloed en oorwinning te leef — met koninkryksgesag.