Koninkryksdissipels met Tony EvansVoorbeeld

Die Verlore Skakel

Daar is vandag 'n verlore skakel in ons kerke — dissipelskap. Vandag begin jou reis om 'n volwaardige dissipel van ons Koning te word. Daar is deesdae 'n tekort aan koninkryksdissipels. Die gevolg is 'n skare van magtelose Christene wat magtelose kerke bywoon wat 'n magtelose teenwoordigheid in die wêreld beliggaam. 

Voor ons nie terugkeer na lewens van dissipelskap nie, sal ons aanhou faal in ons roeping om te leef as die hemel se verteenwoordigers op aarde. Dit is omdat die mag, gesag, oorvloed, oorwinning en impak wat in die Woord van God aan sy mense beloof word, slegs ons s'n is wanneer ons onsself in pas bring onder Hom as sy dissipels. Tot dan kan ons verwag dat chaos en krisisse sal aanhou om die oorhand te kry, ten spyte van al die Christelike aktiwiteite waarin ons betrokke is, die Christelike boeke wat ons lees, die Christelike liedjies wat ons sing en die kleingroepe waarby ons aansluit.

Dissipelskap is 'n baie persoonlike keuse. Dit begin wanneer 'n persoon hom- of haarself toewy aan God as sy volgeling en toelaat dat die resultaat daarvan oorvloei in alle terreine van die lewe. 

Oorgawe aan Christus se heerskappy en gehoorsaamheid aan sy reël van liefde, ontsluit God se krag om hemel op aarde te bring. 'n Koninkryksdissipel leef hierdie Goddelike krag en invloed uit. 

Ek definieer koninkryksdissipel as volg: 'n gelowige in Christus wat deelneem aan die geestelike ontwikkelingsproses om toenemend te leer om alles van die lewe onder die heerskappy van Jesus uit te leef. 

Die doel van koninkryksdissipels is om herskepte lewens te leef wat die koninkryk van God se waardes oordra na die wêreld sodat hierdie waardes hulleself herhaal in die lewens van ander. Die gevolg van hierdie herhaling is God wat sy heerskappy en gesag uitvoer vanuit die hemel tot in die geskiedenis deur sy koninkryksdissipels. 

Die woord wat vertaal word as gesag beteken “mag, reg, vryheid, jurisdiksie en krag". Toe Jesus gesê het: "Aan My is alle mag gegee in die hemel en op die aarde" (Matteus 28:18b), het Hy gesê dat Hy die wettige reg het om daardie mag te gebruik.

Wanneer jy die belangrikheid van gesag besef, sal jy as 'n koninkryksdissipel wil groei tot waar jy nie net die duiwel sal kan weerstaan nie, maar ook die hemel kan aanroep, soos Jesus gedoen het, om jou in jou aardse aktiwiteite te dra. 

Jesus bied jou totale gesag in Hom aan wanneer jy as sy dissipel leef. Baie magte gaan teen jou te staan kom wat sterker is as wat jy ooit op jou eie kan wees, maar Hy het klaar die wêreld oorwin (sien Johannes 16:33). Dink na oor die troos en vrede wat voortspruit uit die wete dat jy toegang het tot die gesag van die Skepper van die heelal. Laat hierdie werklikheid jou motiveer om as 'n dissipel van die Koning te groei.