Koninkryksdissipels met Tony EvansVoorbeeld

Die Onverskrokke Belydenis

As jy by jou werkplek of in jou gemeenskap daarvan beskuldig word dat jy 'n Christen is, sal daar genoeg bewysstukke wees om jou skuldig te bevind? Of sal jy onskuldig bevind word?

Jesus het 'n duidelike verband getref tussen sy volgelinge se openbare erkenning en belydenis van Hom, en sy belydenis van ons voor die Vader. Jesus het nie gesê dat as jy sy Vader voor mense erken, Hy jou voor Hom sal erken nie. Om te bely dat jy in God glo was nie sy doel nie. Dit is immers maklik om te sê jy glo in God. Mense het so baie verskillende definisies van die woord God dat om slegs sy Naam te sê, nie altyd die vlak van toewyding oordra nie.

Wanneer jy egter vir Jesus Christus openlik bely, weet almal van wie jy praat. Die Naam van Jesus kan nie verwar of afgewater word nie.

Die openbare belydenis van Jesus kan vergelyk word met 'n getroude persoon wat 'n trouring dra. Die trouring is aan die ringvinger om 'n openbare verklaring te maak van 'n wettige, bindende verhouding met 'n ander persoon. Jy kan getroud wees en verkies om nie jou ring te dra nie, sodat niemand sal weet dat jy getroud is nie, maar ek twyfel of jou huweliksmaat daardie keuse sal ondersteun.

Baie Christene wat in die familie van God ingetrou het as die bruid van Jesus Christus, wil nie 'n ring dra nie. Hulle wil nie hê dat ander mense van hul verbondsverhouding met Jesus moet weet nie. Wanneer dit nie gerieflik is om met Jesus geassosieer te word nie, sê hulle eenvoudig soos Petrus, "Ek ken die man nie!" Jesus het dit duidelik gemaak, as gevolg van hierdie keuse, sal Hy ontken dat Hy hulle ken as hulle na Hom en sy optrede as bemiddelaar tussen hulle en God die Vader roep.

Jou private toewyding aan Jesus en jou openbare erkenning van Hom beïnvloed tot watter mate jy sy mag en gesag in jou lewe ervaar. Min mense besef die verbintenis tussen toewyding en belydenis van Jesus en die vermoë om die lewe se uitdagings te oorkom. Wanneer jy egter daardie verbintenis maak en dit uitleef, is jy op die weg om ten volle te wees waarvoor jy geskape is en om as 'n koninkryks-dissipel op te tree.