MigaVoorbeeld

Lees: Miga 3:9-12; Psalm 82

SOAP: Psalm 82:2

Jerusalem sou geoordeel word omdat dit ‘n plek geword het waar geregtigheid nie meer geskied het nie. Die regeerders, priesters en profete het allerlei sondes gedoen, tog het hulle steeds voorgegee dat hulle God se wil doen. Hulle het alles vir ‘n wins en tot hulle eie voordeel gedoen, maar het hulle sondes verdoesel as “diens” aan die Here.

Hulle ongehoorsaamheid sou tot gevolg hê dat Jerusalem, die heilige stad, vernietig word. Die tempel sou verdwyn en die mense sou in ballingskap geneem word. Ons lees in Klaagliedere 4:13: “Dit het gebeur oor die sondes en oortredinge van die stad se profete en priesters deur wie onskuldige mense daar om die lewe gebring is.” Hulle wou nie glo dat die vyand Jerusalem sou binneval nie. Hulle het geweier om te glo dat God heilig is en dat sy verbond met sy mense afhanklik is van hulle gehoorsaamheid.

Wanneer iets verkeerd is, moet ons ons dit met wortel en tak uitroei. Dit mag wel pynlik wees, maar dit is die enigste manier om dinge reg te doen. Wanneer die liggaam aangeval word deur verrotting, moet die geaffekteerde deel afgesit word om sodoende die hele liggaam te red. Ons moet dieselfde doen met sonde. Dit moet met wortel en tak uitgeroei word sodat ons ‘n lewe kan lei wat God behaag.

Liewe Heer, help my om my sonde raak te sien, te bely en dit uit my lewe te verwyder. Ek wil nie net voorgee dat ek ‘n heilige lewe lei nie, ek wil graag heilig wees soos U heilig is. Help my, O Heer, om ‘n lewe te leef wat U behaag. In die Naam van Jesus, amen.