Laai die Bybeltoep afOnverwagsVoorbeeld
Vrees kom nie van God af nie en dit is nie kragtiger as God nie. Tog het Hy geweet dit sal kom om ons vrede te steel, nie net een of twee keer nie, maar voortdurend; regdeur ons lewens. Dus het God in sy groot genade en getrouheid vir ons 'n manier voorsien om toegerus te wees om die gevolge te oorkom en in geloof te wandel. Hy het ons drie wapens gegee om op staat te maak wanneer ons aangeval word: "Want God het ons nie 'n gees van lafhartigheid gegee nie, maar van krag, liefde en selfbeheersing" (2 Timoteus 1:7 NLV).
Hierdie vers toon duidelik vir ons dat vrees 'n gees is, en dit is nie van God nie. Dus elke keer wanneer vrees ons probeer vasgryp, is dit die vyand wat ons probeer onderkry en ons bangmaak om God te vertrou. Die gees van vrees is geen gelyke vir die Gees van God wat binne ons woon nie — die Een wat ons krag, liefde en 'n gesonde verstand gee. Ons kan op Hom staatmaak, op Hom reken en te midde van vrees en angs in vrede wandel, want Hy wat in ons is, is groter as enigiets of enigiemand wat ons teenstaan.
Wanneer ons op die Heilige Gees staatmaak, kan ons moedhou, want ons veg nie alleen nie. Ons veg die goeie stryd van geloof met God se krag, fokus nie op vrees nie en probeer nie om dit uit ons eie krag te oorwin nie, maar vertrou op God, wetende dat Hy getrou is. Ons maak staat op die krag, liefde en gesonde verstand wat Hy ons gegee het.
Ek het besef dat hoe meer ek my Hemelse Vader vertrou, hoe meer word vrees in my hart en in my verstand oorwin. As ek meer op God as op 'n onverwagse omstandigheid fokus, dan is dit God wat die grootste in my hart en gees sal wees en vrede sal my uitkoms wees.
Die Woord van God beloof ons dat die pad wat Hy ons gegee het opwaarts en nie afwaarts kronkel nie, maar ons moet Hom groter maak sodat ons geestelik, emosioneel en fisiek op daardie pad kan bly.
Aangepas uit "Unexpected: Leave Fear Behind, Move Forward in Faith, Embrace the Adventure" deur Christine Caine. Kopiereg © 2018 deur Christine Caine. Herdruk met toestemming van Zondervan Uitgewers. Alle regte voorbehou.
Aangaande hierdie leesplan
Dit is tyd om vrees agter te laat, in geloof vorentoe te beweeg en om die avontuur aan te gryp. Met behulp van hierdie 14-dag leesplan gaan jy jou geloof versterk in 'n God wat goed is en leer om in die vreugdevolle vryheid van volkome vertroue in Hom te leef, selfs in onverwagte omstandighede.
More
