OnverwagsVoorbeeld

Toe ek in 2015 uitgevind het dat ek 'n kankergewas op my skildklier gehad het, was dit so onverwags. Soos ek daardie ervaring beleef het, het ek besef dat as ons stop en daaroor nadink, elke dag met die onverwagte gevul word. Ons maak ons ​"moet doen"-lysies. Ons stel ons in dat ons ​​dag volgens plan gaan verloop. Dit gebeur egter nie, want onderbrekings wat ons nooit gesien kom het nie, kom ons lewens binne en bring die onverwagte.

Alhoewel die onverwagte ons verras, moet ons onthou dat ons onverwagte nooit onverwags vir God is nie. God het geweet dat dié dag in my lewe sou kom, en Hy was reeds in daardie dag en het vir my gewag. Vrees het my probeer keer, soos natuurlik gebeur as ons slegte nuus ontvang, maar ek het geweet ek kan nie toelaat dat dit my oorweldig nie.

Ek het geweet ek moes ophou om te ver vooruit te dink — aan Nick en ons dogters en die onbekende toekoms, of ek sou lewe of sterwe, of dit geneesbaar was of nie. Ek het genoeg geweet om te herken dat my weghol-gedagtes vinnig in 'n gevaarlike rigting kon gaan en my in 'n donker plek laat beland. Ek het geweet dat ek moes bly glo. Soos baie situasies waarin ek al voorheen was, het ek geweet daar was 'n keuse om te maak. Die keuse was myne: sal ek in vrees of geloof leef?

Dit was geloof wat my altyd deur my omstandighede voortgedryf het; dus het ek geloof gekies. Dit het egter nie beteken dat die vrees weggegaan het nie. Dit het my nogtans versoek, maar ek het geweet dat die versoeking van vrees nie dieselfde was as om daarvoor in te gee nie — en om nie in te gee nie, was die enigste manier waarop ek sy greep kon oorkom.

Ek het begin om in geloof te leef deur my in 'n "geloofskokon" toe te vou. Dit is wanneer ek besluit om aktief in die Woord te bly, voortdurend te luister na aanbiddingsmusiek en net geloofsgevulde stemme toe te laat om oor 'n bepaalde situasie inspraak in my lewe te lewer. Ek het besef ek moes net geloof spreek. Ek het geleer dat ons óf ons vrees, óf ons geloof voed, en dat ek die mag het om te kies watter een ek sou voed — ek het dus my geloof gevoed. Ek het na God toe gehardloop en nie weg van Hom af nie. Ek het die goeie stryd van geloof gestry.

Deur Christine Caine se nuutste boek, Unexpected, te lees, kan jy dieper in hierdie boodskap van bonatuurlike vrede en volkome vertroue in God delf, selfs wanneer die lewe 'n onverwagse draai maak. Kom meer te wete daaroor hier. 

Aangepas uit "Unexpected: Leave Fear Behind, Move Forward in Faith, Embrace the Future" Deur Christine Caine. Kopiereg © 2018 deur Christine Caine. Herdruk met toestemming van Zondervan Uitgewers. Alle regte voorbehou.