MATIUS 18
18
Inai kaminang bakka' lalang ri Pakkaraengang Suruga
18:1-5
(Mark. 9:33-37; Luk. 9:46-48)
1 #
Luk. 22:24
Rihattu injo riekimu ana'-ana' gurung injo mange ri Isa na akkuta'nangi, ”Inaimo lakaminang bakka' lalang ri Pakkaraengang Suruga?” 2Jari Isa akkeo'i se're ana' ki'di' na lataroi a'bora tangnga ri iyai 3#Mark. 10:15; Luk. 18:17ampai appau, ”Sitoje'na Nakke appau mange ri kaui, ampa geleko jarra na a'jari assimpole ana' ki'di' inni, geleko laantama' lalang ri Pakkaraengang Suruga. 4Mingka inai jua lapakatuna kalenna na a'jari assimpole ana' ki'di' inni, iamo lakaminang bakka' lalang ri Pakkaraengang Suruga. 5Inai jua anruppai se're ana' assimpole inni lalang arengKu, Nakkemo intu laruppai.”
Inai lapassabaki doraka tau inni
18:6-11
(Mark. 9:42-48; Luk. 17:1-2)
6”Mingka inai jua lapassabaki risala se'renna ana' ki'di' tappa' inni ri Nakke anggeokang kadorakaang, la'bi bajikangi ri ia ampa se're batu gilingang risaa' ri kallonnna ampai rilabuang ri tamparang. 7Silakamu lino surang sikonjo passala nulapassabaki tau inni doraka: Toje'i passala injo parallu larie', mingka silakamu tau anggeokang injo.
8 #
Mat. 5:30
Ampa limammu iyareka bangkemmu lapassabakiko anggeokang kadorakaang, pappa'i na pela'i injo, saba' la'bi bajikangi ri kaui antama' lalang ritallasa surangang lima potte' iyareka kempang bangkemmu kalasangka'i rua limammu surang bangkemmu ripantama' lalang ri api gele injo minang mate bola'na. 9#Mat. 5:29Ampa matammu lapassabakiko anggeokang kadorakaang, su'bi'i na pela'i injo, saba' la'bi bajikangi ri kaui buta sihali matammui antama' ritallasa kalasangka'i matammu ripantama' ri naraka.
10U'rangilalo, ako attua-tua risala se'renna ana' ki'di' inni. Saba' Nakke appau mange ri kaui: Rie' malaeka'nai ri Suruga seppa' ri a'rakanna AmmangKu ri Suruga. [11Saba' Ana' Rupatau rie'i lappakasalama' tutappela'.]”
Pakkalebarang jimbala tappela'
18:12-14
(Luk. 15:3-7)
12”Anteekamua panguppamu? Ampa rie' tau akkalahaki jimbala sibilangang kajunna, na rie' sikaju lingu, gelejua ia labokoi jimbala kaassapulo kaassa injo kajunna ri parang na mange laboja jimbala lingu injo? 13Sitoje'na Nakke appau mange ri kaui: Ampa lauppamu nulaboja injo, la'bi bakka' karannuanna ri nusikaju injo battu ri nukaassapulo kaassa injo kajunna nugele injo lingu. 14Appakonjo todo'i Ammammu ri Suruga gele lakaa'raki manna se're tau ri ana'-ana' inni latappela'.”
Passala appiu'rangi ri urang siana'
18:15-20
15 #
Luk. 17:3
”Ampa rie' urang siana'mu a'bua' kadorakaang, piu'rangi lalang appa' mata. Ampa lapitoli pappiu'rangimmu injo ia muuppai muliang. 16#Ul. 19:15Ampa gele lapitoli pappiu'rangimmu, ngurangko pole se're tau iyareka rua tau, solanna panyinarinna rua tau iyareka tallu tau sa'bi, toje'i palakara injo. 17Ampa iyai pole gele a'ra' lapitoli, lagarai passala'na mange ri jamaah. Ampa manna jamaah injo pole gele a'ra' lapitoli, rapangi ia assimpole tau tide' tappa'na ri Allataala iyareka se'rei tau palele ngowa. 18#Mat. 16:19; Yah. 20:23Sitoje'na Nakke appau mange ri kaui: Apa muka'ba' ri lino inni lata'ka'ba' todo'i ri Suruga na apa mulekkesi ri lino inni lata'lekkesi todo'i ri Suruga. 19La'bipa pole Nakke appau mange ri kaui: Ampa rie' rua tau ri lino inni assamaturu' ngera manna apa jua, pangerana injo risareangi ri AmmangKu ri Suruga. 20Saba' ri antee-tee mae rie' rua tau iyareka tallu tau asse're-se're lalang ArengKu, Nakke rie' ri injo ritangnga-tangnganai.”
Pakkalebarang ripassala assare ampung
18:21-35
21 #
Luk. 17:3-4
Rimaenna injo rie'mu Petrus na akkuta'nangi mange ri Isa, ”Karaeng, lapinsikuranga parallu allappasi kasalaanna urang siana'ku ampa ia a'bua' kasalaang mae ri nakke? Sa'gennaka pintujung?” 22Appihali Isa mange ri ia, ”Gele! Nakke appau mange ri kaui: Gele sa'genna pintujung jua, mingka sa'genna pintujupulo a'lappi tuju.
23Saba' passala Pakkaraengang Suruga ripakkalebarangi se're karaeng a'ra' lassirekengang surang sikonjo pagahena. 24Sungka'na pakaramulamo assirekengangi, rierammu mange ri a'rakanna se're tau rie' inranna doe' a'juta-juta. 25Mingka kanara tau injo gele akkulle labajara inranna, lapassuroangi karaeng injo solanna ia, bahinenna na ana'na surang sikonjo pa'barang-baranganna ribalukang pa'bajara inrang. 26Jari joppa'mu pagahe injo, lakua: Rikamaseanga na risarea hattu, lakubajara juai sikonjo inrangku. 27Maeng injo a'rikodommu karaeng injo ripangamaseang ri pagahe injo, sa'genna lalappasangi na lapattide'mu inranna.
28Mingka rihattu ansulukanna pagahe injo, assijanjangi pagahe maraeng turie' injo todo' inranna ri ia doe' a'bilangang sa'bu. Lajakkalai na laparro' kallong bahaanna injo, lakua: Bajarai inrammu! 29Jari joppa'mu bahaanna injo na laerai ri ia: sabbaramoko riolo! lakubajara ngase' juai sikonjo inrangku. 30Mingka ia gele a'ra' na laerang bahaanna injo antama' ri pattarungkuang sa'genna lalappasi inranna.
31Lajanjanna injo baha'-bahaang maraenna sanna' pa'risi' nyahana jari lapa'jammakangi sikonjo kajariang mange ri karaeng panginrangannai. 32Karaeng injo lasuro keo' tau injo na lakua mange ri ia: Oe pagahe daa sipa', sikonjo inrammu maemmo kupattide' rikanara pangeramu mae ri nakke. 33Gelejua kau parallu todo'i mukamaseang bahaammu assimpole nakke ngamaseang ri kau? 34Kuku'mu karaeng injo na lasuro erangi mange ripallapi' barambanna ampai lasissa, sa'genna lappasa labajara inranna.
35Appakonjo todo'i lalageokang AmmangKu ri Suruga mange ri kaui, ampa geleiko a'ra' allappasi kasalaanna urang siana'mu silambusu'na atimui.”
Currently Selected:
MATIUS 18: LAI_SLY
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
@LAI 2012 Indonesian Bible Society (Lembaga Alkitab Indonesia)