MATIUS 17
17
Isa ripakala'biri ri baho bonto
17:1-13
(Mark. 9:2-13; Luk. 9:28-36)
1 #
2 Ptr. 1:17-18
Annangallo maenna injo Isa laurangi Petrus, Yakobus na Yahya uranna siana', na assurangi Isa nai' rise're bonto langkasa. Ri injo iyai jua. 2Maeng injo appinra tappana Isa ri a'rakang matannai; rupanNa assau assimpole matanna allo na pakeanNa a'jari pute a'billa' assimpole sinara. 3Jari kajanjangammu ri iyai Musa na Elia a'bisara mange ri Ia. 4Appaui Petrus mange ri Isa, ”Karaeng, sukku' sungguba rie' ri tampa' inni. Ampa a'ra'Ki, tapa'buakangKi tallumbatu barumbarung, se're dahuamMu, se're dahuanna Musa na se're pole dahuanna Elia.” 5#Kej. 22:2; Ul. 18:15; Mzm. 2:7; Yes. 42:1; Mat. 3:17, 12:18; Mark. 1:11; Luk. 3:22Sikalinna rihattu appauna juapa rie'mo salihu' sinara lakalimbukii na battu lalang ri salihu' sinara injo rie' sa'ra lalangngeri, lakua, ”Innimo Ana' Kukamaseang, mange ri Ia jua Kukarannuang, Iamo pilangngeri.” 6Rilalangngere'na injo joppakimu ana'-ana' gurunNa saba' sanna' mallakinna. 7Jari mange Isa ri iyai na latempai ampai appau, ”Ammentemmoko, akomo malla'!” 8Rihattu ammongainna, gelemu anjanjangi manna se're tau passangadinna Isamamo kale-kalenna.
9Rihattunnaimo naung battu ri baho bonto injo, appasangi Isa mange ri iyai, ”Ako kalena lagarai numujanjangi injo manna mange jua rise're tau ri gelenapa Ana' Rupatau ripakaattallasa muliang battu rikamateang.” 10#Mal. 4:5Jari akkuta'nangi ana'-ana' gurunNa mange ri Ia, ”Ampa appakonjo, ngura appaui guru Tora' injo ma'nassana Elia parallu riolo larie'?” 11Pappihalinna Isa, ”Toje' larie'i Elia na laappakabaji' ri iangase'na, 12#Mat. 11:14na Nakke appau mange ri kaui: Elia rie'mu, mingka gele laisse' tau, na labuaki assituru' nulakaa'raki injo. Appakonjo todo'i Ana' Rupatau lasissai kanara ri iyai.” 13Rihattu injo lapahangimu suro-suroNa ma'nassana Ia a'bisara ripassala'na Yahya pario.
Isa appakagassing se're taruna garring mate-mate jangang
17:14-21
(Mark. 9:14-29; Luk. 9:37-43)
14Rihattunna Isa na ana'-ana' gurunNa muliangi mange ri tau lohe injo, rie'mo se're tau lapiuppai Isa na joppa'i, 15lakua, ”Karaeng, kamaseanglalo ana'ku. Ia garring mate-mate jangangi na sanna' sissana. Ia biasai a'dappe' antama' ri api na biasa todo'i naung ri ere. 16Maemmu kuerang mange ri suro-suroTa, mingka iyai gele akkulle lapakagassing.” 17Jari appaui Isa, ”Oe kau tau gele intu tappa' na lingu, lasikurapa pole sallona Nakke laammari ritangnga-tangngamui? Lasikurapa pole sallona Nakke laparallu sabbara ri kau? Erangi ana' intu mae konni!” 18Ia riga'gara bakka' ri Isa, jari ansulu'mu setang injo battu ri ia na gassing siba'lalo ana' injo.
19Maenna injo riekimu ana'-ana' gurunNa na rihattu assa'la'-sa'lakinna surangi Ia, akkuta'nangimu, ”Ngura kambe gele akkulle taga'gara setang injo?” 20#Mat. 21:21; Mark. 11:23; 1 Kor. 13:2Ia appau mange ri iyai, ”Kanara bata-bataimmu. Saba' sitoje'na Nakke appau mange ri kaui: So'di' injo rie' tappa'mu manna komojuai lisere sinahu injo akkulleko appau mange ri bonto inni: A'lette'ko ri tampa' inni mange konjo, – jari a'lette'i bonto inni, na gele rie' nuterasa ri kau. [21Setang appakonni inni gele akkulle riga'gara rimaraenganna pangera dowaang na appuasa.]”
Makapinruanna lapappiissekang passala kasissaanna Isa
17:22-23
(Mark. 9:30-32; Luk. 9:43-45)
22Rihattunna Isa na ana'-ana' gurunNa assurang-surang ri Galilea, appaui Isa mange ri iyai, ”Ana' Rupatau laripassareang lalang ri limanna rupatau 23na Ia lalahunoi na ri allo makatalluna Ia attallasai muliang.” Simpung ngase'mu pa'mai'na ana'-ana' gurunNa.
Isa a'bajara bea mange ri Sapo Allataala
17:24-27
24 #
Kel. 30:13, 38:26 Rihattunna Isa na ana'-ana' gurunNa ambattu ri Kapernaum riekimu paera bea Sapo Allataala injo mange ri Petrus na lakua, ”Barang gurummu gele a'bajara bea mange ri Sapo Allataala?” 25Pappihalinna, ”Baa, a'bajarai.” Rihattunna Petrus antama' ri sapo, Isa laruppai pakkuta'nang, ”Anteekamua panguppamu, Simon? Battu ri antee mae sikonjo karaeng ri lino inni ngalle bea surang sima? Battu ri jannanganna iyareka battu ri tau dere?” 26Appihali Petrus, ”Battu ri tau dere!” Jari appaui Isa mange ri ia, ”Jari lappasamu jannanganna. 27Mingka solanna andaki appakahussang mange ri iyai, a'lampako mange mekang ri tamparang la'ba injo. Alle juku' uru eka'mu na sungke babana, languppako doe' pa'bajara lalang ri babana. Alle injo na pabajarai mange ri iyai, mae ri Nakke surang ri kau todo'.”
Currently Selected:
MATIUS 17: LAI_SLY
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
@LAI 2012 Indonesian Bible Society (Lembaga Alkitab Indonesia)