Emveni ke kwezo ntsuku, uElizabhete umfazi wakhe wamitha, wazifihla iinyanga zantlanu, esithi, Yenjenje uYehova kum ngemihla eyandikhangelayo, ukuba ndikususe ukungcikiveka kwam phakathi kwabantu. Ngenyanga yesithandathu, isithunywa esinguGabriyeli sathunyelwa nguThixo emzini welaseGalili, ogama liyiNazarete, kwintombi, eganelwe indoda egama linguYosefu, yendlu kaDavide; laye igama lentombi leyo lalinguMariya. Sangena isithunywa kuye, sathi, Vuya, wena ubabalweyo! iNkosi inawe; usikelelwe wena phakathi kwabafazi. Uthe ke akusibona, wee qhiphu umbilini ngenxa yelizwi laso; wayecamanga ukuba ungaba mbuliso mni na lo. Sathi ke isithunywa kuye, Musa ukoyika, Mariya, kuba uThixo ukwenzela isisa. Uyabona, uya kuthabatha esizalweni, uzale unyana, umthiye igama elinguYesu. Yena uya kuba mkhulu, abizwe ngokuba nguNyana wOsenyangweni; iNkosi uThixo iya kumnika itrone kaDavide, uyise. Uya kuba ngukumkani phezu kwendlu kaYakobi kude kube ngunaphakade; ubukumkani bakhe abuyi kuba nasiphelo. Wathi ke uMariya kuso isithunywa, Kuya kuthini na ukubakho oku, ndingazani nandoda nje? Saphendula isithunywa sathi kuye, uMoya oyiNgcwele uya kuza phezu kwakho, athi namandla Osenyangweni akusibekele; kungoko loo nto ingcwele izalwa nguwe iya kubizwa ngokuba nguNyana kaThixo. Uyabona, naye uElizabhete ozalana naye, ukhawule unyana ebudaleni bakhe; yaye le yinyanga yesithandathu kuye, lowo kwakusithiwa uludlolo. Ngokuba akukho nanye into eya kumnqabela yena uThixo. Wathi ke uMariya, Nanko umkhonzazana weNkosi; makube kum ngokwelizwi lakho. Saza isithunywa semka kuye. Ke kaloku, wesuka uMariya ngaloo mihla, wasinga kweleentaba ngobungxamo, emzini wakwaYuda; wangena endlwini kaZekariya, wambulisa uElizabhete. Kwathi, akuwuva uElizabhete umbuliso kaMariya, lwasuka lwaxhuma usana esizalweni sakhe, uElizabhete wazala nguMoya oyiNgcwele; Wadanduluka ngezwi elikhulu, wathi, Ùnentsikelelo wena phakathi kwabafazi; sinentsikelelo nesiqhamo sesizalo sakho. Iyintoni na ke le nto kum, ukuba eze kum unina weNkosi yam? Kuthe, kuthe lakubakho izwi lombuliso wakho ezindlebeni zam, lwasuka lwaxhuma usana ngovuyo esizalweni sam. Unoyolo lowo wakholwayo koko, kuba kuya kubakho inzaliseko yezo zinto zithethiweyo kuye yiNkosi. Wathi ke uMariya, Umphefumlo wam uyenza nkulu iNkosi; Nomoya wam ugcobile ngoThixo uMsindisi wam; Kuba wakukhangela ukuthobeka komkhonzazana wakhe; kuba, uyabona, ziya kuqala kwangoku ukuthi ndingonoyolo zonke izizukulwana. Ngokuba undenzele izinto ezinkulu uSomandla; lingcwele igama lakhe. Inceba yakhe ikwizizukulwana ngezizukulwana Kwabo bamoyikayo. Wenze amandla ngengalo yakhe; ubachithachithe abanekratshi ekucingeni kweentliziyo zabo. Ubathobile abanamandla ezitroneni zabo, wabaphakamisa abathobekileyo. Wahluthisa abalambileyo ngezinto ezilungileyo; wabandulula abazizityebi belambatha. Wasiza uSirayeli, umkhonzi wakhe, ngokukhumbula inceba yakhe; Njengoko wathethayo koobawo bethu, kuAbraham nakwimbewu yakhe ngonaphakade. Wahlala ke uMariya naye iinyanga ngathi zaba ntathu, waza wabuyela endlwini yakhe.
I-App yeBhayibhile
I-App yeBhayibhile Yabantwana
