Iivesi zeBhayibhile ezithandwayo ezisuka MATEO 24

Share

Niźaśa źoñinakaki añcha mirźku ñexuź khekićha, neqhśtan jilamanqha źoñinakaki anaź yaqha źoñinaka oqźnakićha. Xalla ni tukuśinskama thurt'iñiki liwrïtaź khekićha.

Niźaśa ti irpiñi Yöś śuma kintu thapa ti źoñinakźkin maśintaź khekićha, thapa ni chawkh wathanaka śiśaxu; neqhśtanź ti yoqa tukuśinski thonakićha.

Niźaśa anćhukki kir kintuź śiśakićha teqśimi nakhumi, anćhukki anaź tsukakićha nuźupan watśtanćha; niźaśa imaśićha ti tukuśinski.

Nación poraź qichasakićha, reyno poraź qichasakićha; thapa qhutñi yoqaki cheqhnakićha niźaśa phomsnakićha, mach'aź watakićha thapa yoqqhutñi. Xalla tinakaćha uśhka t'aqhiśiś qallantiśki.

Ni tsewkta pachami niźaśa ti yoqami watakićha, xalla ni weriź chïta taquki anaź watasaćha.

Niźaśa wakchi źoñinakaki weth thükiś thonakićha tuź khikan: ‘Werhtćha Mesías khititki’, neqhśtan wakchi źoñinaka millk'untakićha.

“Neqhśtan anćhukki śhoxrichaxu thätaź khekićha; niźaśa kontaź khekićha niźaśa thappacha ti yoqkiś źelhñi źoñinakaki weriź khen, anćhukki ćhhaxwtaź khekićha. Neqhśtan ni pachaki tama źoñinakaź kephsnakićha, niźaśa ninakporaź ćhhaxwqatasakićha niźaśa ninakporaź millk'untasakićha. Niźaśa tama toskar Yöś śuma kintu chïñi źoñinakaź jekźnakićha, neqhśtan tama źoñinaka millk'untakićha.

Jesusaki ninakźkiś qhäśićha: –Anćhukki kuytaśakićha, ana jëkhmi anćhuk millk'untaxu.

Niźtikiśtan anćhukmi thakśipan khekićha; xalla ni źoñź Matiki ana thewźnanź thonakićha.

“Neqhśtan anćhukki anaź thxaxakićha, niźaśa ana śiśśa ćhhul thuñit thonaćhaxa ni anćhuka Yöś tataki.

“Niźaśa ni thonś thuñiki niźaśa ni thonś orami anaź jëkhmi śiśśa, ni tsewkta yoqkin źelhñi anjilanakami anaź śiśśa, niźaśa ana ni Yöś Matimi. Yöś Ephqaź śiśśa.

Niźaśa toskar mesias nakaź thonakićha, niźaśa toskar yośkiśtan chïñinakaź thonakićha; niźaśa paqh chimpunakaź thëźnakićha niźaśa milajrunakaź thëźnakićha źoñi millk'untiśxapa, niźaśa Yöś illśtanakamiź millk'untasaćha.

“Niźaśa Noeź ni pacha xaqhnuź watchiślax, xalla niźtaśaqaś watakićha ni źoñź Mati kephźkiś thuñkiśiki. Niźaśa ni chijñi mach'iź tukiki, ni pacha ni źoñinakaki lulatćha niźaśa likatćha niźaśa kaśaratćha ni Noé tshi nöx tshi paqh walsikiś luśhkama, niźaśa ni źoñinakaki ana naychićha ni chijñi mach'a thonñi, niźaśa ni qhaśki thappacha ni źoñinaka quźśićha. Xalla niźtaśaqaś ni źoñź Mati kephśkiśki watakićha.